Óskar Matute, diputáu d’EH Bildu y de la nuesa coalición Agora Repúbliques, presenta les entrugues que nin Barbón nin el Gobiernu PSOE-Podemos-IU quieren oyer
Hai unos díes conocióse’l casu de los 31 trenes d’anchu métricu, encargaos pol Ministeriu Tresportes, Movilidá y Axenda Urbano a la empresa Construcciones y Auxiliar de Ferrocarriles, destinaos a renovar los trenes que presten sirviciu nes llínies que Renfe Cercaníes AM (antigua FEVE) tien foncionando n’Asturies y Cantabria, y que foron diseñaos con un escesu gálibu que torga’l so usu nes víes previstes.
Darréu pues consultar, nes imáxenes axuntes, la lliteralidá de les siete entugues que presentamos al Gobiernu español, al traviés del compañeru Óskar Mature, diputáu d’EH Bildu y miembru de la coalición Agora Repúbliques, na ta presente Andecha Astur xunto con otros partíos nacionaliegos del Estáu.
Sicasí, ca entruga representa en sí mesmo una denuncia por parte d’Andecha Astur, una denuncia de la mísere consideración con que’l Gobiernu español trata al Pueblu Asturianu, una denuncia del llabor vergoñosu y chapuceru del Ministeriu Tresportes, una denuncia de la complicidá cola que los integrantes del Gobiernu español consienten esto (PSOE, Podemos, IU), una denuncia de la docilidá cola qu’Adrián Barbón encaria estes agresiones cuandu lleva conociéndoles d’hai tiempu.
Asina señalamos que l’error cometíu, la paralización de la fabricación, el rediseñu de los trenes y el retrasu na so puesta’n sirviciu representa un dañu cuantificable en millones d’euros.
Creyemos que’l Gobiernu asturianu debería desixir a Madrid que compensare a los viaxeros con dalguna rebaxa nel coste los billetes de Renfe Cercaníes AM, por tener qu’utilizar, polo menos tres años más, los trenes que circulen anguañu, avieyaos y que yá nun ufren la calidá y seguranza de viax óptimes que son mester.
Desiximos que’l Gobiernu español faiga públicu’l documentu o acta de l’Axencia Estatal de Seguranza Ferroviaria, con data de setiembre de 2021, correspondiente a una xunta na que s’analizó’l problema d’estos trenes d’anchu métricu con escesu gálibu.
Queremos que’l Gobiernu español desplique por qué caltuvo’n secretu, polo menos dos años, el problema d’estos trenes.
Sabemos que vienen de ser cesaos dos altos cargos del Ministeriu Tresportes, pero dambos teníen un calter téunicu. Abúltamos imprescindible’l cese de dalgún altu cargu, de perfil políticu, nel Ministeriu responsable d’esti casu de risión internacional.
Queremos que’l Gobiernu español mos diga si recibió dalguna iniciativa, suxerencia, pidíu de desplicaciones, quexa o protesta del Gobiernu d’Asturies, emitía enantes de 2023 con rellación al casu d’estos trenes. Queremos que’l Gobiernu español confirme qu’Adrián Barbón, conociendo’l casu, calló obedientemente convirtiéndose’n cómpliz de los responsables.
Y, pa finar, queremos que’l Gobiernu español confirme que nun tien inconveniente dalu pa negociar col Gobiernu d’Asturies el trespasu efeutivu de competencies esclusives en materia de ferrocarriles que circulen íntegramente per territoriu asturianu. Pa dar la importancia que tien al fechu de que son Barbón y la FSA-PSOE los que se ñeguen a eses treferencies, cola esculpia de que sedríen un pufu p’Asturies. Non, pufu sedría si ellos son unos inútiles o unos obedientes negociando con Madrid el valor económicu d’eses competencies. Lo que ta demostrando asina Barbón ye o la so docilidá énte Madrid, o la so incapacidá manifiesta comu negociaor o dambes coses.
One thought on “Andecha Astur presenta nel Congresu siete entrugues al Gobiernu español sobro los ‘trenes XXL’ de FEVE”