L’actu va cellebrase esti domingu 16 d’agostu y va reivindicar la soberanía proclamada pol pueblu asturianu en 1937 como referencia histórica y apueste de futuru
Esti prósimu domingu 16 d’agostu, Andecha Astur va cellebrar nel Puertu Tarna l’actu añal d’homenaxe a la Declaración de Soberanía del Conseyu d’Asturies y Llión, proclamada’l 24 d’agostu de 1937. Una decisión histórica pola que’l pueblu asturianu asumió’l gobiernu del país y exerció la so soberanía frente a la República española y al avance de les tropes facistes.
La xornada entamará cola xubida a les trincheres de L’Abidular-Filispardi, onde se va recordar a les asturianes y asturianos que defendieron el Puertu Tarna frente al exércitu franquista y les fuercies alemanes ya italianes que lu sofitaben. Darréu, va cellebrase l’homenaxe políticu y la ofrenda floral énte’l monumentu dedicáu al Conseyu Soberanu.
La proclamación de 1937 nun foi un xestu simbólicu. El Conseyu asumió toles funciones de gobiernu, organizó la defensa del territoriu, emitió moneda propia, impulsó una alministración soberana y llegó a solicitar el reconocimientu internacional d’Asturies énte la Sociedá de Naciones.
Sicasí, la República española negó’l sofitu al Conseyu Soberanu y antepunxo la unidá d’España a la defensa del pueblu asturianu. Décades dempués, la denominada Transición tampoco recuperó la última gran institución democrática propia escoyida pol pueblu asturianu. En cuenta d’ello, Madrid impunxo un “Principado” y un Estatutu d’Autonomía ensin consultar a la ciudadanía asturiana.
P’Andecha Astur, recuperar la memoria del Conseyu Soberanu nun significa mirar con señardá al pasáu, sinón reivindicar una referencia política plenamente vixente. Frente a un modelu autonómicu subordináu, incapaz de garantizar siquiera la oficialidá de la llingua asturiana, defendemos el drechu del pueblu asturianu a decidir llibremente’l so futuru.
L’actu del Puertu Tarna ye un homenaxe a quien defendieron Asturies frente al fascismu, pero tamién una reafirmación del compromisu actual cola reconstrucción nacional y social del país. La soberanía ye la ferramienta necesaria pa disponer de los recursos, les instituciones y la capacidá política que permitan construyir una Asturies democrática, socialmente xusta y dueña del so futuru.
Dende Andecha Astur facemos un llamamientu a militantes, simpatizantes y al conxuntu de la sociedá asturiana a participar esti domingu nel homenaxe del Puertu Tarna.
Domingu 16 d’agostu
Puertu Tarna
10:00 xubía a L’Abidular-Filispardi]
13:30 Homenaxe énte’l monumentu al Conseyu Soberanu]
Frente al “Principado” impuestu, soberanía asturiana.
Memoria, dignidá y futuru pal nuesu país.
