Nesta cabera fase de la campaña escontra la masificación turística que carez Asturies Andecha Astur da un pasu más y lleva’l mensaxe direutamente a la cai. Por ello, editemos 300 camisetes col llema “Turistes: Asturies nun ta en venta”, acompangáu de la reivindicación “Por un turismu caltenible, respetuosu col mediu ambiente y la identidá asturiana”.
Queremos que la campaña se personalice, que cada persona que comparta esta reivindicación pueda facer visible’l mensaxe y llevar puesto qu’Asturies nun ye un productu en venta nin un parque temáticu al serviciu del turismu.
Les camisetes van ponese a disposición de la xente por 5 euros, estrictamente a preciu de coste, ensin nenguna finalidá comercial. Los pedíos puen facese al corréu lletrónicu andechainfo@gmail.com.
Dende Andecha Astur nun cuestionamos el turismu como actividá económica. Lo que denunciamos ye un modelu de turistificación que pretende facer del turismu ún de los principales motores económicos del país y que sigue midiendo l’ésitu pol aumentu permanente del númberu visitantes, ensin atender a les consecuencies sociales, económiques y ambientales que provoca sobro la población asturiana.
Nun queremos más turistes a cualesquier preciu. Queremos un turismu que respete Asturies, la nuesa cultura, el mediu ambiente y los drechos de los trabayaores.
La masificación turística yá tien consecuencies bien nnidies. Aumenta la presión sobro la vivienda, favorez la proliferación de pisos turísticos, contribúi a espulsar población de determinaos barrios y conceyos, incrementa precios, satura carreteres y aparcamientos, presiona espacios naturales y servicios públicos y convierte fasateres enteres del país n’espacios pensaos ca vegada más pal visitante y menos pa quien vive nellos tol añu.
Tampoco nun podemos aceptar que se presente como modelu de futuru una economía dependiente d’un sector especialmente estacional y carauterizáu demasiaes vegaes pola precariedá, mientres se siguen debilitando sectores productivos que podríen xenerar riqueza, emplegu estable y soberanía económica.
La mentira del “refuxu climáticu”
Resulta especialmente grave la utilización que fai’l Gobiernu del Principáu de la idega d’Asturies como “refuxu climáticu” pa promocionar el turismu.
Denunciamos esta expresión como lo que ye: una mentira convertía en reclamu publicitariu.
Asturies nun ta fuera del cambéu climáticu. Tamién equí aumenten les temperatures, sufrimos periodos de seca, incendios forestales y alteraciones ca vuelta más evidentes nos ciclos naturales. Nun hai nengún refuxu máxicu frente a una cris climática global.
Pero, amás, resulta d’una irresponsabilidá descomanada utilizar precisamente’l cambéu climáticu como una oportunidá de mercáu. Nun se puede falar de sostenibilidá al empar que se convida a miles de persones a desplazase fasta Asturies pa escapar del calor d’otros territorios, aumentando la presión sobro’l país precisamente nos meses nos que mayor saturación sufrimos.
El cambéu climáticu nun pue convertise nun folletu turísticu.
Asturies tien llendes. Tienen llendes los espacios naturales, les carreteres, los aparcamientos, los recursos y los servicios públicos. Y tien que tener tamién una llende la subordinación de la vida cotidiana de los asturianos y asturianes a les necesidaes d’una industria turística que quier crecer indefinidamente.
Dende Andecha Astur apostamos por un turismu caltenible, sometíu a la capacidá real del territoriu, respetuosu col mediu ambiente, cola cultura, cola identidá asturiana y los drechos de los trabayaores. Un modelu nel que la vivienda seya primero pa vivir, nel que se protexan los espacios naturales y nel que los intereses del visitante nun se coloquen perriba de los drechos de la población.
Queremos que quien venga a Asturies conozca’l país y lu respete. Pero nun aceptamos que se diseñe Asturies pensando primero en quien vien unos díis y dempués en quien vive equí tol añu.
Por eso nesta cabera fase queremos personalizar la campaña y llevar esti mensaxe a les cais, pueblos, barrios y villes d’Asturies.
TURISTES: ASTURIES NUN TA EN VENTA
Por un turismu caltenible, respetuosu col mediu ambiente y la identidá asturiana.
300 camisetes · 5 € a preciu de coste
Pedidos: andechainfo@gmail.com
