Andecha Astur quier amosar el so sofitu a la concentración convocada por Asturies Antitaurina esti xueves, a les 19.30 hores, nes Lletrones de Xixón, con motivu del Día Mundial Antitaurín. Facemos un llamamientu a la sociedá asturiana a participar nesta acción reivindicativa y a espresar, una vegada más, el refugu mayoritariu del nuesu pueblu a les corríes de toros y a cualesquier forma de maltratu animal.
La tauromaquia nun forma parte de la tradición asturiana. Al contrariu, ye una práctica ayena a la nuesa manera histórica d’entender la relación colos animales y cola tierra. Asturies tuvo y tien una cultura propia, venceyada al respetu, al trabayu nel mediu rural y a una convivencia colos animales que nada tien que ver cola crueldá convertida n’espectáculu.
Les feries taurines, y particularmente la Feria de Begoña de Xixón, representen una imposición españolista que vien siendo contestada pola población asturiana dende hai más d’un sieglu. Yá en 1914, la Sociedá Antiflamenquista Cultural entamó un actu públicu pa reclamar l’anulación d’aquella feria, presentada daquella como reclamu turísticu. Dende entós, el refugu popular a la tauromaquia caltúvose vivu y volvió salir a la cai cada vez que se pretendió normalizar esti espectáculu de violencia.
Andecha Astur considera especialmente grave que, nun momentu nel que la sociedá avanza escontra una mayor conciencia ética sobre los derechos de los animales, vuelvan defendese corríes de toros y se pretenda inclusive abrir l’alderique sobre la presencia de menores nestos espectáculos. Nun hai cultura nin patrimoniu que pueda xustificar la tortura pública d’un animal.
Xixón ye antitaurina, y Asturies tamién. La mayoría social asturiana refuga la tauromaquia, magar los intentos de dellos sectores políticos y mediáticos por presentar una imaxe contraria a la realidá. Les movilizaciones antitaurines celebraes cada agostu n’Asturies, coincidiendo cola Feria de Begoña, son una muestra clara d’esa conciencia colectiva y d’una llucha que sigue medrando.
Por too ello, Andecha Astur sofita la concentración d’esti xueves nes Lletrones de Xixón y reafita’l so compromisu cola defensa de los animales, cola cultura asturiana y cola fin definitiva de les corríes de toros nel nuesu país.
Escontra’l maltratu animal, cultura asturiana y dignidá.
Asturies nun ye taurina.
