Andecha Astur fai llegar la so solidaridá a Jorge Fernández y Rubén Rosón, militantes d’AMA Asturies agredíos n’Uviéu, y llama a participar na concentración convocada pa güei, sábadu 12 de setiembre, a les 19:00 hores na plaza de la Catedral.
L’agresión producida nel contestu de les fiestes de San Matéu, con insultos políticos y homófobos y espresiones d’esaltación franquista, nun pue tratase como una simple engarradiella nin como un fechu aislláu. Los dos militantes tuvieron que recibir atención hospitalaria y la convocatoria d’esta tarde pretende dar una remspuesta social a unos fechos sobro los que pue consultase la información publicada por InfoAsturies.
Dende Andecha Astur entendemos que ye necesario responder con firmeza, pero tamién preguntase cómo se llegó a un clima nel que determinados grupos se sienten cada vegada más cómodos exhibiendo símbolos facistes, profiriendo amenaces y utilizando la violencia nel espaciu públicu.
Nun tamos énte un problema desconocíu. Andecha Astur yá tuvo que denunciar énte Fiscalía actos d’exaltación facista en Xixón, nuna actuación na que tamién reclamemos esplicaciones sobro la pasividá institucional y policial. La impunidá, cuando se repite, acaba convirtiéndose en permisividá.
La responsabilidá directa de cada agresión ye de quien la comete. Pero les instituciones y les organizaciones polítiques tampoco nun puen eludir la so responsabilidá na normalización pública de la extrema drecha, tratándola demasiáu davezu como una opción política más ensin atender a les consecuencies sociales de los sos discursos.
Hai un exemplu especialmente significativu. Nel entamu de la llexislatura de 2019 Vox obtuviera namás dos diputaos y, col Reglamentu vixente nel momentu de les elecciones, nun reunía’l mínimu de tres necesario pa disponer de grupu parllamentariu propiu. En xunetu d’esi añu la Xunta Xeneral reformó expresamente l’artículu 27.1 del Reglamentu, col sofitu del PSOE, permitiendo formar grupu propiu con dos escaños y un 6 % de los votos.
Aquella decisión tuvo consecuencies polítiques y materiales: dio a Vox estructura propia, recursos públicos, personal, más tiempos d’intervención y una visibilidá institucional que, coles normes coles que se celebraren les elleiciones, nun tenía. Nun ye serio favorecer institucionalmente la consolidación d’una organización d’estrema drecha y presentar dempués el so xorrecimientu como si fuera un fenómenu ayenu a les decisiones del restu de fuerces polítiques.
Andecha Astur yá denunció n’otres ocasiones actuaciones de cargos de Vox que consideramos contraries a los derechos democráticos y culturales d’Asturies. Nun se trata de responsabilizar a una decisión parllamentaria concreta d’una agresión producida años dempués, sinón d’entender que la estrema drecha nun se normaliza sola: tamién se normaliza cuando se-y faciliten espacios, recursos y respetabilidá institucional.
Frente a ello, Andecha Astur reafita’l so compromisu antifacista, inseparable de la defensa de les llibertaes, los derechos sociales y la soberanía del pueblu asturianu. Un compromisu que forma parte de la nuesa memoria política y que sigue presente na reivindicación de quien defendieron Asturies frente al facismu.
Por eso resulta insuficiente condergar cada agresión cuando se produz. Ye necesario torgar la impunidá, abandonar la permisividá y dexar de blanquiar política ya institucionalmente a los que faen del odiu, la discriminación y l’autoritarismu una ferramienta política.
Andecha Astur llama a responder ensin cayer na provocación, pero ensin mirar tampoco pa otru llau. La defensa de les llibertaes, de la diversidá y del drechu a participar na vida política ensin mieu necesita una rempuesta social firme y colectiva.
Ello asina, llamamos a la militancia, simpatizantes y al conxuntu de la sociedá asturiana a participar na concentración convocada esta tarde.
Sábadu 12 de setiembre — 19:00 hores
Plaza de la Catedral — Uviéu
