La declaración de Soberanía del Pueblu Asturianu de 1808, vixente dafechu, nuna Asturies que s’enfrenta a ún de los piores periodos de la so hestoria
La xunidá del pueblu asturianu frente a un enemigu común, que culminó cola declaración de Soberanía de la Xunta Suprema ye un referente hestóricu d’actualidá nuna Asturies que precisa urxentemente xuncir esfuercios nun frente común que defendan los llexítimos drechos ya intereses presonales y colleutivos de les asturianes/os, énte les polítiques del Estáu español p’Asturies, que tan esfarrapando’l nuesu texíu cultural y socio-económicu de tala miente que ponen en pelligru la propia sobrovivencia comu pueblu, calteniendo al conxuntu de la sociedá asturiana nuna situación de precariedá permanente y forciando a la emigración a decenes de miles de moces/os asturianos.
Ello asina, Andecha Astur perafítase na necesidá de vindicar el 25 Mayu, y la Soberanía Popular que representa, como un apueste de futuru; y anque considera un trunfu consiguir que’l ‘Principado’ nun-y quede otra que reconocer esta fecha hestórica, denuncia los sos intentos de remanamientu políticu y folclorización d’esta fecha.
Per otru llau, Andecha Astur cellebrará el XXV Díi d’Andecha esti prósimu sábadu 28, procediendo a un actu políticu y una ofrenda floral a les puertes de la Sala Capitular -Plaza Corrada del Obispo- onde tuvo llugar la mencionada declaración de Soberanía cola qu’Asturies recuperó la independencia nel sieglu XIX.
