Inicio > Asturies > Asturies: 36 años de Pin Parental llingüísticu
AsturiesLlingua AsturianaPortada

Asturies: 36 años de Pin Parental llingüísticu

Cuando s’afitó, al traviés del estatutu d’Autonomía, la voluntariedá del deprendimientu del asturianu nun se nomó Pin Parental, sinón “drechu de les families a escoyer voluntariamente”, que suena meyor, pero ye esautamente lo mesmo

El pin parental ye la ferramienta pa que los pas y mas puean vetar contenios nes aules. Desixen “Información previo y autorización espresa” pa que la reciella reciba determinaes ensiñances. Respigante, ¿verdá? Increyible que’n plenu sieglu XXI entá hebia neardentales que pretendan impedir que los sos fios reciban una educación completa que los ensiñe a respetar los drechos más básicos…

¿Increyible? N’Asturies non tanto.

Información previo y autorización espresa ye lo que se pide, dende va cerca cuarenta años, pa que los rapacinos deprendan la propia llingua. La voluntariedá del deprendimientu del asturianu pon en manes de los sos proxenitores lo que deprenda la reciella. Una ferramienta de represión puesta en manes de los que, por inorancia o por antiasturianismu esplícitu, deciden ñegar a les futures xeneraciones un drechu humanu básicu, el de la so propia llingua.

Y nun foi dengún partíu que se defina a si mesmu comu d’estrema drecha quien llantó esti sistema, fo’l mesmu PSOE qu’agora s’escandaliza pola propuesta de poner en marcha la mesma xabazada -poner en manes de les families la decisión de qué los neños acudan o non a actividaes que desendolquen los centros educativos-, pero refería agora a materies d’educación ya identidá sesual.

La voluntariedá del deprendimientu del asturianu vien direutamente recoyía nel Estatutu d’autonomía, (istauráu antidemocráticamente, ensin cuntar col votu de los asturianos), en concreto, nel so Artículu 4º. Puntu 1. “El bable gociará de proteición. Promoveráse’l so usu, el so espardimientu nos medios de comunicación y el so enseñu, respetanto en tou casu, les variantes llocales y la voluntaridá nel so deprendimientu”. Claro qu’entós nun se llamó pin parental, sinón “drechu de les families a escoyer voluntariamente”, que ye lo mesmo, pero suena meyor.

Deja un comentario

Tu dirección de correo electrónico no será publicada. Los campos obligatorios están marcados con *