Inicio > Asturies > Mariano Suárez: “Hai qu’entamar un frente en defensa de los intereses d’Asturies y del Pueblu Asturianu”
AsturiesPortada

Mariano Suárez: “Hai qu’entamar un frente en defensa de los intereses d’Asturies y del Pueblu Asturianu”

OLYMPUS DIGITAL CAMERA

Na intervención política del XXV Díi d’Andecha, Mariano Suárez anunció la  intención d’Andecha Astur de centrar los sos esfuercios n’algamar un frente común sobro la base de la condición inequívoca d’asturianu  y d’una izquierda amplia y participativa.

Tres analizar la situación de cris demográfica, llaboral, socioeconómica y mediuambiental na que mos llevaron les polítiques del Estáu español p’Asturies, valoró la situación como “insostenible, tan insostenible que naide pue dicir que non a un frente común pa defendemos”.

Asina mesmo definió a les sucursales de los partíos españoles n’Asturies como cenciellos tresmisores de los mandatos de los sos amos de Madrid, “solo son vehículos de tresmisión de los nuesos problemes. Nun van ser nunca la solución a los mesmos”, llegando a la concluxón de que “Asturies tien que llegar a defendese sola”.

La propuesta, allantrada por Mariano Suárez nesti Díi d’Andecha, supón la necesidá d’afitar unos criterios mínimos al rodiu los cualos pueda enartase una rempuesta común qu’ufra a la sociedá asturiana una ferramienta útil de defensa frente a les agresiones del Estáu español, y un mediu de tresformación social y recostrución nacional.

Dende la rialidá de que, nes condiciones d’anguañu, nun hai capacidá d’algamar una representación istituciónal cola que defender los llexítimos intereses y drechos colleutivos de les asturianes/os y la esperiencia de que los “proyeutos políticos millagru” qu’apaecen a pocu tiempu de les convocatories elleutorales esapaecen ensin otru llogru que’l xenerar desunión, la única alternativa posible ye algamar un frente común de base amplia nel que se puedan afayar les estremaes formes d’espresión del asturianismu socialmente comprometíu.

Enantes d’entamar el XXV Díi d’Andecha, procedióse a la rialización d’una ofrenda floral a les puertes de la Sala Capitular onde tuvo llugar la declaración asturiana de Soberanía del 25 Mayu, cola qu’Asturies recuperó la independencia nel sieglu XIX.

Deja un comentario

Tu dirección de correo electrónico no será publicada. Los campos obligatorios están marcados con *