Andecha Astur creye vergoñoso ya inútil que’l Gobiernu de Barbón, dempués d’años de complicidá delictiva, disimule declarando Bien d’Interés Cultural la Obra Cultural de Caxastur
Andecha Astur afita que l’espoliu cometíu por Caxastur namás pue compensase cola espropiación, por interés social, de los edificios y obres artístiques que componen la Obra
La Caxa d’Aforros d’Asturies ñació’n 1946 con presupuestos públicos ya enfotos de sirviciu a la sociedá. Y viose finar reconvertía nun bancu priváu, afogá por un déficit escandalosu y una xestión ñidiamente delictiva en munchos aspeutos. Ente les causes, la llarga xestión, déspota y escurantista, que fexeron de Caxastur los sos cabezaleros, los banqueros favoritos del PSOE.
Agora poco más queda que salvar lo salvable, qu’amás ye padremuñu de tol pueblu asturianu: la Obra Cultural de Caxastur. Esto ye, el conxuntu d’obres d’arte que, col dineru invertíu polos asturianos en Caxastur, ésta foi acumulando a lo llargo la so esistencia.
Décades lleva la sociedá asturiana denunciando al Gobiernín del PSOE que la Obra Cultural taba ensin control, con parte allugá nun se sabía ónde y otra parte “desapaecía”. Nesi tiempu infame’n que Gobiernu d’Asturies y Caxastur compartíen intereses económicos y políticos inconfesables, ná se quinxo facer, nin dende la Xunta Xeneral nin dende’l Palaciu de Suárez de la Riva. La complicidá de los políticos na xestión perversa de Caxastur convirtió a la Obra Cultural nuna más de les víctimes d’esta situación.
Agora tamos nun tiempu’n que los sucesores de Caxastur nun quieren dar información cierto y completo de qué obres conformen esta ayalga social y ónde s’allugen. Naide nun sabe cuántes obres permanecen baxo’l control de la Obra Cultural, anque se faló de 3.000 y fasta de 5.000. Naide nun sabe ónde ta una bona parte d’elles, anque siguen en poder de la Obra. Y sí se sabe qu’otra parte “desapaeció” pa siempres, anque puean tar decorando dalguna mansión privá.
Y, agora, nesti contestu, ye cuandu Berta Piñán, comu Conseyera de Cultura’n fonciones, y Adrián Barbón, comu presidente’l Gobiernu’n fonciones, s’arremanguen pa disimular la so plena responsabilidá, faciendo por intentar declarar Bien d’Interés Cultural la Obra Cultural de Caxastur. Agora. Dempués de que la mafia banquera del PSOE fizo y desfizo, llevó y trixo, camudó y desapaeció lo que quinxo.
Per un llau, Andecha Astur denuncia la complicidá, activa y pasiva, del Gobiernu d’Asturies nesta estafa y robu artísticu de gran alcance.
Per otru llau, denunciamos que la pretendía declaración de Bien d’Interés Cultural ye insuficiente por cuatru razones:
- Ye una midía qu’aporta sero, con un desastre delictivu dafechamente consumáu.
- Nun garantiza’l plenu control públicu de los bienes culturales que diz querer protexer.
- Dexa la propiedá de los bienes nes propies manes de quien malversó y “desapaeció” la Obra.
- Sólo inclúi nel inventariu una cantidá mínima de les pieces artístiques que componen la Obra Cultural de Caxastur, el restu queden desprotexíes y en manes de nun se sabe quién.
Creyemos que sólo l’acesu de l’Alministración Pública asturiana a la propiedá d’esos bienes pue garantizar la so permanencia y la so puesta a dimposición de los fines sociales y culturales colos que s’anició la Obra. Poro, Andecha Astur pidió al Gobiernu’n fonciones de Barbón, qu’espropie la Obra Cultural de Caxastur, n’exerciciu de les posibilidaes llegales que permite l’artículu 39 de la Llei 1/2001, de 6 de marzu, del Padremuñu Cultural d’Asturies (BOPA nu 75, de 30 de marzu de 2001), y otres normatives d’aplicación al casu.
Esta espropiación afeutaría a dos tipos de bienes:
- A los dos edificios hestóricos que, en Xixón, permanecen en propiedá de la Obra: el Palaciu Revillaxixéu y la Colexata de San Xuan Bautista.
- Cuantes obres artístiques se determinen pertenecientes a la Obra Cultural de Caxastur.
Pa una mayor eficacia del procesu d’apropiación pública d’esti padremuñu social, el Gobiernu asturianu debería afalar un proceso d’investigación policial que permitiere recuperar les munches obres artístiques “desapaecíes”.
