El “Principado” folcloriza la Declaración de Soberanía del 25 Mayu

Andecha Astur considera un trunfu consiguir que’l gobiernu de Barbón rialice una cellebración oficial de la fecha, pero denuncia la so folclorización y reitera les sos propuestes

L’enfotu de la izquierda nacionaliega asturiana al defender el 25 mayu comu fecha señalá de la nuesa hestoria como Pueblu, sirvió pa caltener esi díi na memoria popular y consiguió’l trunfu de forciar al Gobiernu de Barbón a la so cellebración oficial d’esta fecha, que se cellebra esti añu por segunda vegada, pero remanando los conteníos políticos de los fechos,  folclorizando la cellebración y tapeciendo’l fechu fundamental: la Declaración de Soberanía del Pueblu Asturianu.

Ello asina Andecha Astur reitera les sos propuestes pa cellebrar istitucionalmente la Declaración de Soberania del 25 Mayu -que foron tramitaes pola Xunta Xeneral en 2021- pidiendo que la Xunta aprebe una serie d’iniciatives y cellebre ca añu, de manera dina ya istitucional, que’l 25 mayu de 1808 la Xunta Xeneral exerció una temprana reconocencia política de la soberanía popular de les asturianes y asturianos, declarándose soberana, formando l’Exércitu Defensivu Asturianu, dotándose d’embaxaores d’Asturies qu’unvió al Reinu Xuníu, aniciando tribunales propios, istitucionalizando la bandera d’Asturies y collaborando col Pueblu Asturianu na defensa’l país astur y na escoyeta’l so futuru.

Les midíes propuestes a la Xunta Xeneral por Andecha Astur son éstes:

• Que la Xunta Xeneral declare’l 25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, remembrando la declaración de la Xunta Xeneral d’Asturies comu entidá soberana d’Asturies en 1808.
• Que’l 25 mayu de ca añu la Xunta Xeneral convoque una sesión estraordinaria del so Plenu, na que se llea un testu de remembranza d’aquella declaración soberana d’Asturies.
• Que’l 25 mayu de ca añu el Plenu de la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía.
• Que’l 25 mayu de ca añu la Sala Capitular de la Catedral d’Uviéu permaneza abierta al públicu pa la so conocencia y reconocimientu.