Ante la medría de los discursos y episodios racistes, xenófobos y facistes que vienen produciéndose n’Asturies y ante los graves fechos de los últimos díes en Ceuta, Andecha Astur fai pública la so solidaridá coles persones migrantes y la so oposición a cualquier espresión de racismu, xenofobia o violencia facista y llama a concentrase’l prósimu día dos.
N’Andecha Astur consideramos especialmente esmolecedor el clima xeneráu alredor de la crisis de Ceuta y denunciamos la utilización de les persones migrantes como oxetu de criminalización colectiva. La organización recuerda que nos últimos díes produxéronse ataques contra asentamientos y pertenencies de persones migrantes asina comu una escalada de discursos xenófobos y amenaces nes redes sociales y prensa, llegando a facese llamaes a “cazar” seres humanos. La difícil situación que carecen los ceuties nun pue utilizase como xustificación pa normalizar discursos racistes, señalar colectivamente a les persones migrantes nin alimentar un clima de confrontación social col únicu envís de remanar sofitos a idegues de “supremacía nacional”, discriminación racial y “xunidá d’España” que consideramos seriamente peligroses.
Poro, llamamos a participar esti miércoles, 2 de setiembre, a les 20:00 hores, nes concentraciones antirracistes de Xixón y Llangréu, coincidiendo cola hora señalada pol Partíu Popular usurpando’l nome de la Federación Española de Municipios y Provincias (FEMP) pa los actos presentaos como de «solidaridá con Ceuta».
Dende la organización reafirmamos la nuesa posición contra’l racismu, la xenofobia y el facismu, y en defensa de los drechos humanos y de la convivencia n’Asturies.
Concentraciones anunciaes — miércoles 2 de setiembre, 20:00 hores
Xixón – Plaza Conceyu
Llangréu – Plaza Conceyu
