La reivindicación de la Soberanía foi la exa principal del actu d’homenaxe a la proclamación de Soberanía del Conseyu d’Asturies y Llión.
Nel actu cellebráu nel Puertu Tarna, qu’entamó cola xubía a les trincheres del Filispardi, Andecha Astur reivindicó el Conseyu Soberanu como una referencia hestórica, y un apueste de futuru:
«Frente a un ‘Principado’ y un Estatutu impuestos dende Madrid, un Conseyu proclamáu soberanu pol pueblu asturianu, frente al sucursalismu, la sumisión y el servilismu, la Soberanía del Pueblu Asturianu pa decidir llibremente’l so futuru».
La xornada entamó cola xubía a les trincheres del Filispardi/L’abidular onde un añu más dexóse llantada una asturiana y lleóse la proclamación de soberanía asturiana de 1937, qu’establecía:
«El Conseyu Interprovincial d’Asturies y Llión, de magar la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdicción y a elli queden dafechamente sometíes toles xurisdicciones y organismos civiles y militares que funcionen o vaigan funcionar dientru’l mentáu territoriu.»
Darréu, tuvo llugar l’actu la ofrenda floral y l’actu políticu nel monumentu al Conseyu Soberanu d’Asturies y Llión, nel qu’intervino Llucía Fernández
INTERVENCIÓN DE LLUCÍA FERNÁNDEZ
Tamos güei equí remembrando la declaración de Soberanía del conseyu Soberanu d’Asturies Y Llión. N’agostu del 1937 los asturianos dixeron, hasta equí lleguemos, la República española nun mos representa, agora decidimos nosotros por nosotros. Y declaráronse soberanos. Crearon instituciones, moneda, un exércitu, atribuyéronse toles competencies que tien un estáu. Solicitaron el reconocimientu a la Sociedá de Naciones ya entraron en guerra con tres de los mayores exércitos del momento, l’español, l’alemán ya l’inglés. Cuatro, en realidá, porque a la República española tuviéronla tamién en contra, dexando mui claro que preferíen una Asturies facista a una Asturies llibre.
¿Cómo pudieron estos homes y muyeres organizase tan bien, movilizase por miles, de tolos pueblos, de toles ciudaes, subir al monte y crear en tiempu record una llinia de trincheres comparable a la Maginot francesa, fabricar casamates, almacenes, xestionar el caltenimientu, l’avituallamientu d’una movilización tan grande? Bono, en parte porque nun foi frutu de la improvisación, sinón un procesu trabayau y preparáu. Pero sobre tou, porque teníen fe.
Creyeron firmemente en que, cola razón y la xusticia na so man, nun podíen perder, por grande que fuere l’enemigu. Creyeron que merecía la pena poner en riesgu la so vida si con ello aseguraben un futuru meyor a los asturianos futuros, nosotros.
Si, perdieron. Lloxicamente, perdieron: la diferencia de fuercies yera brutal y la traición de dalgunos acabó cola única baza que teníen pa ganar, el conocimientu de los nuesos montes.
Pero nun ye esa la cuestión. Quiero céntrame nel fechu de tolo que consiguieron. Porque nos tamos equí, los irreductibles, calteniendo l’enfotu a dures penes, peleando dia ente díi pa nun sentir que nel fondu ta too perdío, que nun hai na que podamos facer. ¿D’aú nos vien esti derrotismu? Nun tien sentíu. Hai muncho por facer. Hai una Asturies por salvar, un futuru meyor por construir.
Esi derrotismu vienmos de qu’ellos perdieron y de que los que ganaron lleven más d’ochenta años repitiéndomos que perdimos, que somos unos perdedores, al tiempu que se mos oculta la heroicidá de los que, siendo pocos y piqueños, dieron la cara ante xigantes. Ye verdá, crecimos con esi complexu de que ser nos taba mal.
Pero vamos quedando pocos de los que conocimos de primer man a los que perdieron la guerra. Tres de nosotros vienen xeneraciones d’Asturianos que, d’eso vamos encarganos, van saber que nesta tierra vivieron siempre valientes, pero que nun foron educaos na derrota. Asturianos, descendientes d’aquellos que llucharon, descendientes de los qu’emigraron y agora vuelven o asturianos recién llegaos d’otra parte del mundiu, porque, parafraseando a un grande, un asturianu ñaz onde y da la gana, pero toos ellos con un enfotu común: crear p’Asturies meyor na que vivir, un futuru dignu, el que nosotros decidamos, una Asturies onde se pueda vivir, trabayar, ser. A toos esos asturianos y asturianes convocamos, a xunise como entos y crear otres trincheres, otres casamates, feches agora de decisiones, de pallabres, de votos, que cola mesma xunidá qu’entós mos permitan algamar el futuru qu’el pueblu asturianu merez.
Pa finar una nota. Soberanía ye decidir que país somos, si. Pero soberanía ye tamién decidir que les perres van pa bomberos y non pa miradores turísticos, que los carbayos tienen equi el so llugar perriba los ocalitos, que Peñamayor y Salave nun son nomes de mines si los sos moraores nun quieren, que los parques de bateríes nun son una opción y que les viviendes son pa vivir, non pa veraneantes. Soberanía ye decidir. Por ello cellebramos, homenaxeamos, damos les gracies y reconocemos con arguyu a los que tuvieron el valor de ser soberanos.
Puxa’l Conseyu Soberanu d’Asturies y Llión
Puxa Asturies
