Inicio > Asturies > Andecha Astur entruga nel Senáu pol peaxe d’El Güerna
Asturies

Andecha Astur entruga nel Senáu pol peaxe d’El Güerna

Ente la discriminación que supón que’l peaxe d’El Güerna non solo nun esapaeza -como ta ocurriendo con otres autopistes del Estáu- sinón qu’aumente de preciu, Andecha Astur vien de presentar una riestra entrugues pa conocer les xides que motiven tala discriminación.

Les entrugues presentóles Jon Iñarritu, senador de EH Bildu –organización coalligada con Andecha Astur en Los Pueblos Deciden- y al traviés d’elles pretende determinase si esiste daqué xida que xustifique la discriminación que carecemos los asturianos al nun aplicase a l’autopista del Güerna los beneficios que tan aplicándose n’otres autopistes del Estáu, nes que s’elimina’l peaxe o s’amenorga’l mesmu, mentes n’El Güerna increméntase’l preciu.

Como ye persabío, l’espresidente español, Jose L. Rodríguez Zapatero, prometió acuyá nel 2008 la eliminación del peaxe d’El Güerna, lo que ye evidente que nun cumplió, ensin que’l “Principado” nin el PSOE n’Asturies pidiere desplicaciones. Lo mesmo podríemos dicir del PP, que tampoco nun fexo un res al respeutu mentes tuvo nel gobiernu d’España, ensin que’l “Principado” nin el PP n’Asturies gutiaren tampoco.

Ello asina Andecha Astur entrugó nel Senáu español:

  • Qué criterios xustifiquen que mentes s’elimina o baxa’l preciu d’unos peaxes xúbase’l d’El Güerna.
  • En qué situación s’atopa’l peaxe d’El Güerna
  • Qué previsiones/planificación esiste pa esaniciar dichu peaxe.

 Con estes entrugues Andecha Astur quier conocer cuál ye’l futuru que mos espera sobro esta infraestructura vital p’Asturies –acullá de declaraciones a los medios de comunicación valeres de conteníu- y poner n’evidencia la esistencia d’una discriminación inxustificable pa con Asturies y los asturianos de la que son cómplices tanto’l “Principado” como los partíos ellí representaos.

FAI UNA PROPUESTA

La to direición de corréu lletrónicu nun sedrá espublizada. Los campos obligatorios tan marcaos con *