Andecha Astur yá entamó en 2014 –de la que presllaren la llínia- los trámites pa esclariar responsabilidaes y avisó de que “Principado” y Gobiernu d’España nun cumplieren colos sos compromisos
Acabante de presllar l’Autopista la Mar, Xixón-Saint Nazaire, Andecha Astur denunció les inregularidaes y falsedaes de tol procesu, y plantegó al traviés del diputáu Jon Iñarritu, compañeru na coalición Los Pueblos Deciden, la necesidá d’una auditoría de la xestión de la mesma, por mor de los problemes deteutaos nel sirviciu prestáu pola concesionaria LDLines.
Nesi intre, el Gobiernu español asume’l plantegamientu d’Andecha Astur, almite les inregularidaes que llevaron al preslle de l’Autopista y comprométese a llevar a cabu la necesaria auditoría, en coordinación cola Comisión Europea ya’l gobiernu Francés.
Énte l’incumplimientu d’esi compromisu, cuasi un añu más tarde ya ensin que se tuviere conocimientu de dalu resultáu de la nomada auditoría, Andecha Astur tornó a entrugar, nesti casu énte’l Parllamentu Européu y al traviés del eurodiputáu de Los Pueblos Deciden, Josu Juaristi, si efeutivamente taba realizándose dalguna triba d’auditoría a l’Autopista la Mar o si, nel so defeutu, la Comisión Europea tenía previsto llevar a cabu dalgún otru tipu d’investigación no que cinca a la suspensión d’esta llínia; en casu afirmativu, requiríense les conclusiones de la posible auditoría o información de cuándu se cuntaba con teneles.
Pente les inregularidaes que se denunciaben entós taba l’inclumplimientu de los 7 años de sirviciu mínimos pa tener drechu a la sovención recibía pola naviera, destacándose tamién qu’una de les empreses del consorciu beneficiáu pola mesma foi la concesionaria –con una nueva sovención- de la mesma llinia, pero dende Vigo.
Andecha Astur criticó ya entós duramente la incapacidá y desinterés del Gobiernu del “Principado” énte la pérdida d’esta llinia, que vieno a afondar nel nivel d’aisllamientu ya incomunicación d’Asturies. La única rempuesta del entós gobiernu del PSOE ye idéntica a la d’agora: declaraciones vagues a los medios de comunicación ensin repercusión práutica y llamentaciones valeres, col agravante de que, esta vegá, la responsabilidá de la perda de l’Autopista la Mar nun recae na concesionaria –Baviera- sinón na neglixencia d’un “Principado”, que nun foi quién a cumplir los requisitos a los que se comprometió cola naviera y pa los que tuvo dos años de plazu.
Ello asina, confírmense les alvertencies d’Andecha Astur, y la incompetencia y falta d’enfotu del “Principado”, y del Gobiernu d’España, que torga a Asturies la oportunidá única de convertir Xixón nun importante cientru lloxísticu y de reactivar la xunión con una zona xeográfica venceyada non solo comercial, sinón hestórica y culturalmente, al nuesu país.
Ye por ello, polo qu’una vegada más Andecha Astur torna a desixir tanto al “Principado” como al Gobiernu d’España, la másima implicación nesti casu, y el cumplimientu de les sos promeses, nel comencimientu de que de ser asina, tovía ye posible recuperar –anque seya a mediu plazu- esta importante vía de comunicación p’Asturies.
