Inicio > Asturies > Denuncia d’Andecha Astur polos dos trabayaores muertos en Rufrío
AsturiesLlaboralPortada

Denuncia d’Andecha Astur polos dos trabayaores muertos en Rufrío

Andecha Astur vien de presentar na Fiscalía Superior d’Asturies una denuncia pola muerte de dos trabayaores del Sirviciu asturianu de Conservación de Carreteres

La denuncia ye escontra’l presidente Adrián Barbón y los cuatru responsables cimeros de la Conseyería de Mediu Rural y Cohesión Territorial: Conseyeru, Viceconseyeru, Direutora Xeneral d’Infracadarmes y Xefe Sirviciu d’Esplotación y Caltenimientu de Carreteres, pola muerte’l pasáu 1 de xineru, de dos trabayaores entierraos por un ábanu na carretera AS-253, que va de Cabanaquinta al Puirtu Braña (conocíu comu Puertu San Isidro), al altor de Rufrío.

Andecha Astur acusa a estos cincu responsables políticos de tres presuntos delitos: homicidiu por imprudencia, delitu escontra los drechos de los trabayaores y delicu escontra l’Alministración Pública. Toos estos delitos, de demostrase, tán castigaos con penes importantes de prisión y d’inhabilitación pal exerciciu la fonción pública.

La denuncia considera que’Gobiernu asturianu ye responsable d’esos graves delitos porque dende hai décades vien obligando a los ayeranos, a los usuarios de l’AS-253 y a los trabayaores de caltenimientu de carreteres a xugar a la ruleta rusa al desplazase per esta carretera.

Barbón y el so Gobiernu saben qu’esa fastera tien l’altor y la inclinación desixíos pa la formación sistemática d’ábanos. Saben qu’esa carretera altraviesa zones d’altu riesgu d’ábanos. Saben que les midíes de prevención istalaes son mui poques y tán mui mal manteníes. Saben qu’hai dos estudios científicos que señalen tolos puntos de riesgu de la carretera y les midíes de seguranza que necesita caún d’ellos. Y saben que tolos años caen varios ábanos nuna carretera que nos iviernos lleguen a percorrer 15.000 presones. Pero nunca nun fexeron ná pa iguar esta situación y atayar los riesgos.

Barbón y el so Gobiernu son responsables d’incumplir la so obligación de curiar pola integridá física de los sos trabayaores, cometiendo una imprudencia gravísima con resultáu de muerte, comu responsables que son de la orden llaboral qu’unvió a Rufrío a los dos trabayaores muertos. Son responsables d’esa orde imprudente de trabayar naquel llugar, naquelles condiciones alverses y nuna situación conocía de falta seguranza suficiente escontra los ábanos.

Los ayeranos, los usuarios de la carretera AS-253, los medios de comunicación, los partíos representaos na Xunta Xeneral… la sociedá asturiana toa conocía dende hai décades los altísimos riesgos d’esta carretera. Magar les tres muestes asocedíes yá nesa vía, magar les protestes de ca añu, magar la demanda social de seguranza, Barbón y el so Gobiernu incumplieron por inactividá les obligaciones que comu autoridaes y cargos públicos tienen encomendaes.

Poro, creyemos que son supuestos responsables d’estos delitos y desiximos a la Fiscalía l’apertura d’una investigación seria que, de comprebar los fechos denunciaos, permita castigar exemplarmente a los responsables d’estes muertes, asina comu indenizar comu ye mester a les families de los dos fallecíos.

One thought on “Denuncia d’Andecha Astur polos dos trabayaores muertos en Rufrío

Deja un comentario

Tu dirección de correo electrónico no será publicada. Los campos obligatorios están marcados con *