Inicio > Asturies > 1 Mayu ¡Pola xusticia social y la redistribución de la riqueza
AsturiesConceyosInternacionalLlaboralMás noticiesMocedáMuyerPortada

1 Mayu ¡Pola xusticia social y la redistribución de la riqueza

Escontra una “Nuea Normalidá” que tarace entá más los drechos y llibertaes d’Asturies y la so xente.

La cris sanitario prevocá pol coronavirus fizo españar otra: una fonda cris del sistema capitalista qu’acaba d’entamar y que, de xuru, va afondar na desigualdá de presones y territorios en llibertaes, drechos y calidá de vida.

L’andanciu dio tristemente la razón a quienes denunciábamos cómu los partíos españoles vaciaben de sirvicios y recursos la sanidá pública, n’Asturies y en tol Estáu, recortando, privatizando, malversando… Ellos nun trixeron el virus, pero sí dexaron al pueblu bastante más indefensu ente él. Poro, anque s’esculpien con qu’agora nun ye’l tiempu de falar d’ello, hai que dici-yos ñidio que nes muertes asocedíes hai una parte de responsabilidá político, y la clas trabayaora tien de denuncialo n’abertal.

Nesti 1u Mayu les y los trabayaores d’Asturies tenemos de defender el drechu a una sanidá pública prioritaria. Pero tamién tenemos de tar sollertes, muncho, al intentu del Estáu español y del so “Principado” títere pa, aprofitando la situación de cris xeneral, reconvertir el modelu social vixente, poniéndolu entá más al sirviciu los porgüeyos del Estáu y el capital. Tenemos de lluchar pa que la torna pola que nagüen haza la “Nuea Normalidá” nun tenga comu pegoyos l’endurecimientu de la llexisllación llaboral, un recorte mayor de les llibertaes civiles y una ñegación más agresiva de los drechos de les naciones primíes pol Estáu español.

Si La Xunión Europea y l’Estáu español siempres rescaten la banca y curien los beneficios de les multinacionales y los fondos buitre, ye’l momentu de qu’Asturies desixa’l so drechu a rescatase, a que se mos faciliten los fondos que necesitamos y mos arrampuñaron durante años y a que se reconoza’l drechu los asturianos/es a decidir con llibertá cómu queremos refacer Asturies pa garantizar el futuru d’esti pueblu.

Nun falamos de concesión de créitos especiales que nun son más qu’otra hipoteca, sinón que vindicamos la reconocencia d’una renta básica dina y aídes sociales ensin retornu, non pa la gran empresa, sí pa los paraos, pa los trabayaores regulaos o despidíos, los autónomos pesllaos, los agricultores y pescaores, los pequeños comerciantes, la hostelería y tolos seutores productivos afeutaos, asina comu pa facilitar la torna de los que foron obligaos a emigrar.

Nun falamos de que’l réxime borbónicu retorne la capacidá executiva a les “comunidaes autónomes”cuandu fine l’estáu d’allarma, falamos del acabu d’esi réxime y de la reconocencia de la llexisllación internacional que regula’l drechu les naciones, comu Asturies, decidir el so propiu futuru.

Poro, nesti 1u Mayu convitamos a los asturianos/es a nun confinar el so compromisu social, a dotase d’organizaciones sindicales que reconozan Asturies comu’l marcu específicu nes rellaciones llaborales y a participar activamente en cuantes rempuestes hebia na defensa de los drechos y llibertaes, la xusticia social y la redistribución de la riqueza.

Al empar, Andecha Astur asume’l compromisu de caltener les dos campañes d’aición política que tien en marcha: una pola defensa de la sanidá pública asturiana y otra (#ConsumiAsturiano) p’afalar el consumu de productos del país. Y remembramos la ufierta que ficimos hai poco a toles organizaciones sociales y polítiques d’Asturies p’axuntar esfuercios y xunidá d’aición al rodiu de cuatru exes básiques:

  • En materia de seutores productivos, emplegu, redistribución de la riqueza y cris demográfico.
  • Na promoción d’auditoríes de finances y deldes públiques, na llucha escontra la corrución y el control de la xestión público y la tresparencia.
  • No que cinca a la oficialidá de la llingua asturiana y la so normalización social.
  • Na superación del marcu políticu que carecemos anguañu: un “Principado” y un Estatutu d’Autonomía impuestos y valeros de poder políticu rial.

Escontra’l confinamientu que llanta’l capital, axuntémosmos.

¡Puxa Asturies!

 

1u Mayu 2020

 

 

ANDECHA ASTUR

Deja un comentario

Tu dirección de correo electrónico no será publicada. Los campos obligatorios están marcados con *