Énte les graves inregularidaes nel procesu vacuación, les contradiciones ente los responsables políticos y el silenciu de los másimos responsables, Andecha Astur requier formalmente desplicaciones al Conseyeru Salú del “Principado”
Andecha Astur presentó ente la Xunta Xeneral un escritu nel qu’espón les inregularidaes nel procesu vacunación n’Asturies, especialmente no que cinca a loss cargos políticos, y les contradiciones ente’l presidente del “Principado” qu’afirma que “n’Asturies nun hai dengún altu cargu vacunáu” -cuando ye persabío que si los ha-, y les declaraciones nel sen contrariu de la xerente del Sirviciu Salú del “Principado” (SESPA), Dª Concepción Saavedra, defendiendo la vacunación preferente a direutivos sanitarios y lliberaos.
Ello asina, Andecha Astur requier formalmente al Conseyeru Salú les informaciones que se detallen darréu:
- Númberu vacunes antiCOVID recibíes pol Gobiernu d’Asturies fasta la fecha.
- Númberu vacunes antiCOVID aplicaes pol SESPA a la población asturiano fasta la fecha.
- Colleutivos sociales y profesionales a los que’l SESPA yá aplicó la vacuna antiCOVID, con indicación de cifres de población vacunao por colleutivu.
- Normativa y/o istruciones que’l Gobiernu d’Asturies aplica pa l’alministración de la vacuna antiCOVID, no que cinca a prioridá de colleutivos sociales y profesionales, calendarios de vacunación ya cumplíos y tamién los previstos, etc.
- Normativa concreto na que’l Gobiernu d’Asturies se sofitó pa vacunar comu colleutivos prioritarios a los direutivos del SESPA y a los lliberaos sindicales del mesmu.
- Declaración de si’l Gobiernu d’Asturies tien o non una reserva estratéxica propio de vacunes antiCOVID, indicando, en casu afirmativu, la cantidá de vacunes que la componen, los oxetivos d’esa reserva y la normativa concreto que permite la so esistencia.
- Númberu de cargos y presonal de la Conseyería Salú que yá recibió la primer dosis de la vacuna antiCOVID.
- Númberu de cargos y presonal de Presidencia de Gobiernu d’Asturies y de les sos Conseyeríes restantes que yá recibieron la primer dosis de la vacuna antiCOVID.
- Númberu de miembros de los cuerpos y fuercies de seguranza y de les tropes militares asentaes nel territoriu
Dende Andecha Astur considérase inxustificable’l silenciamientu d’esta información, y l’escurantismu col que ta llevándose tol procesu de vacunación, del que namás trescienden informaciones trunfalistes, ensin rellación cola rialidá, y un sistema de desinformación xeneralizáu nel que cauna de les partes implicaes fai declaraciones contradictores que xeneren un estáu de desinformación y alarma social.
