A resultes de la denuncia d’Andecha Astur, la Fiscalía Superior d’Asturies investiga a Barbón y la so Conseyería de Mediu Rural por presuntu homicidiu por imprudencia y otros dos delitos incluyíos nel Códigu Penal pola muerte de dos trabayaores en Rufrío
La Fiscalía Superior d’Asturies acaba d’abrir dilixencies d’investigación sobro fechos denunciaos por Andecha Astur: la muerte, el 1 de xineru, de dos trabayaores del Sirviciu de Caltenimientu Carreteres del Gobiernu asturianu (los compañeros César y Virgilio), que perdieron la vida en Rufrío cumpliendo’l llabor que-yos encomendaren los sos responsables, lliberar la carretera AS-253 de les consecuencies d’un temporal de ñeve y ábanos.
La Fiscalía investiga a los cincu presuntos culpables siñalaos na denuncia d’Andecha Astur: Adrián Barbón Rodríguez (Presidente`l Gobiernu), Alejandro Jesús Calvo Rodríguez (Conseyeru de Mediu Rural y Cohesión Territorial), Jorge García López (Viceconseyeru d’Infracadarmes Viaries, Movilidá y Territoriu), Esther Díaz López (Direutora Xeneral d’Infracadarmes Viaries y Portuaries) y Manuel Antonio Serrán Gómez (Xefe’l Sirviciu de Caltenimientu y Esplotación de Carreteres).
Les investigaciones de la Fiscalía tendrán d’esclariar si los fechos denunciaos costitúin un delitu d’homicidiu por imprudencia, un delitu escontra los drechos los trabayaores y un delitu escontra l’Alministración Pública, incluyíos los tres nel Códigu Penal.
La denuncia d’Andecha Astur fundaméntse con una gran bayura de datos, testimonios y fasta informes científicos qu’amuesen cómu yera de conocencia pública y oficial que la carretera AS-253 (de Cabanaquinta a Puirtu Braña) presentaba unes pésimes condiciones de seguranza por riesgu grave d’ábanos, por riesgu grave de cayía de piedres de tamañu descomanáu y pola falta midíes proteutores eficaces y suficientes. Les autoridaes llocales, los vecinos del conceyu d’Ayer, los usuarios de la carretera AS-253 y les propies autoridaes perconocíen esa situación d’altu riesgu y munchos d’ellos denunciárenlo públicamente en varies ocasiones.
Hai dos investigaciones científiques (2019 y 2020) que despliquen los motivos polos que la fastera ye llugar ñatural de formación y cayía d’ábanos y señalen 63 tramos de la carretera que presenten un gran riesgu, tando munchos d’ellos ensin midía de proteición dala. Tamién planteguen qué midíes de proteición son necesaries en ca casu y un estudiu de la eficiencia y caltenimientu de les midíes istalaes anguañu, la mayor parte d’elles yá ineficaces.
Barbón y el so Gobiernu saben que tolos años hai ábanos nesta carretera, que ponen en pelligru a los vecinos, los usuarios y los trabayaores de caltenimientu; y saben que los ábanos de 2005, 2008, 2009, 2013, 2017, 2018, 2019 y 2020 foron d’importante entidá y consecuencies
Barbón y el so Gobiernu enxamás añadieron a l’AS-253 nueos elementos de seguranza (viseres antiábanos, valles, malles o vigues de contención d’argayos…), nin aplicaron dengún plan específicu de prevención llaboral a los trababayores de caltenimientu de la carretera, nin fexeron xeres preventives de forestación de la fastera, nin repararon nin renovaron eficazmente les malles de montaña, nin prauticaron preventivamente los ábanos controlaos por esplosión, toes elles midíes siñalaes como necesaries nos distintos estudios. Les autoridaes nun cumplieron les sos obligaciones d’actuación nesta carretera, sicasí, mandaron ellí a los sos trabayaores de caltenimientu, sabeores de los altísimos riesgos que corríen, más nun temporal comu’l qu’había na fecha l’acidente mortal. Poro, la muerte de los dos compañeros en Rufrío tien responsables políticos. Y Andecha Astur escoyó la denuncia llegal enantes que’l silenciu cómpliz que se ta prauticando n’otros ámbetos.
Mesmamente, resulta dolioso ver cómu’l caberu 12 de febreru, los sindicatos con presencia nel sirviciu de caltenimientu de carreteres organicen una concentración y cincu minutos de silenciu n’homenax a César y Virxilio, y permiten, comu si ná, l’asistencia del Conseyeru de Mediu Rural y Cohesión Territorial, Alejandro Calvo, ún de los presuntos culpables del homicidiu por imprudencia, qu’aprofitó la presencia de los medios de comunicación pa intervenir intentando blanquiar les sos responsabilidaes.
Nun mos podemos engañar: La determinación de los responsables políticos y de les sos posibles responsabilidaes penales ye necesaria pa que l’Alministración tome les midíes qu’eviten más muertes de trabayaores.
