Inicio > Asturies > Andecha Astur preséntase como la izquierda d’Asturies tres reforciase nel caberu Conceyu Nacional
Asturies

Andecha Astur preséntase como la izquierda d’Asturies tres reforciase nel caberu Conceyu Nacional

Josu Juaristi, Es-Eurodiputáu de “Europa de ls Pueblos”, participó nel Conceyu Naciona y presentó la nuesa coalición a les europees: “Agora Repúbliques”

VER SEMEYES

Esti sábadu Andecha Astur cellebró’l so Conceyu Nacional, col llema #YeAsturies. La militancia axuntóse en Xixón, na Sala Conferencies del Antiguu Istitutu Xovellanos, y aprebó unos nueos estatutos que garanticen entá más el furrulamientu democráticu y tresparente de la organización.

Pero lo más importante foi que’l Conceyu Nacional punxo les bases pa ufiertar a les asturianes y asturianos un proyeutu políticu de tresformación social, con Asturies como marcu específicu y ufriendo una alternativa digna y viable de futuru pal Pueblu Asturianu.

Asina aprebáronse dos importantes documentos. El primeru, “Llínia política y elleiciones” recueye’l determín d’Andecha Astur de presentase a les prósimes elleiciones de conceyu, nacionales y europees, fixando los criterios estratéxicos oportunos pa estos tres ámbetos; en concreto, apreba la presentación a les elleiciones europees dientru la coallición “Agora Repúbliques”, de la que formen parte EH Bildu (Euskalherria), ERC (Catalunya) , BNG (Galicia) y Andecha Astur, ente otres fuercies nacionaliegues.

El segundu documentu aprebáu, “Asturies nes tos manes. 25 principios xenerales pa un programa políticu”, define’l marcu ideolóxicu que recoyerá’l programa elleutoral de la organización, al sirviciu d’una Asturies socialista y soberana.Tamién se nomó ellí la comisión redautora del programa elleutoral.

El Conceyu Nacional escoyó igualmente la nuea Xunta Executiva de la organización, que formen Paulu Arboleya (comu Secretariu Xeneral), Dulce Xil, Mario Arbesú, Llucía Fernández, Arturu Bermeyu, Carme Pérz, Marcos Fernández y Mariano Suárez.

 

“AGORA REPÚBLIQUES” Y ANDECHA COMPARTEN LA SO VISIÓN D’EUROPA

 Fináu’l Conceyu Nacional entamó un actu políticu abiertu, nel que la militancia, simpatizantes y públicu aconceyáu pudieron escuchar les intervenciones de Josu Juaristi y Llucía Fernández.

Josu Juaristi, es-eurodiputáu de l’actual coalición “Europa de los Pueblos”, desplicó les xeres coles qu’anguañu tán dando forma a “Agora Repúbliques”, la coalición pa les prósimes elleiciones europees na qu’elli tamién sedrá candidatu. Josu espresó que comparte l’analís políticu que nel Conceyu Nacional d’Andecha sintió sobro Europa y la situación política d’anguañu; y dexómos tamién dalgunes idegues ñidies: Asturies ye una de les naciones europees, poro ye importante la presencia d’Andecha Astur na coalición; les naciones que puxamos por ser llibres y soberanes tenemos de xunimos ente la recentralización y drechización estrema del Estáu español; y la coalición “Agora Repúbliques” ye la propuesta digna y útil de les esquierdes que nel Estáu español defenden de verdá los drechos de les clases populares y la soberanía de les sos naciones.

Pela so parte, Llucía Fernández dirixóse al públicu señalando la importancia de qu’Andecha seya una organización a la que nun se-y diz dende Madrid lo que tien de facer nin se-y llanten programes elleutorales. Destacó tamién cómu los trabayos fechos pol Conceyu Nacional mos permiten ufiertamos al Pueblu Asturianu comu una alternativa viable de futuru, frente a les propuestes de la esquierda sucursalista que sofita presupuestos y gobiernos de Foro o del PSOE.

L’actu políticu finó col canciu de “La flor del agua” y una espicha, na que participó Josu Juaristi, acompangando a la militancia y a la nuea executiva d’Andecha Astur.

Deja un comentario

Tu dirección de correo electrónico no será publicada. Los campos obligatorios están marcados con *