Otra consecuencia de les polítiques d’Adrián Barbón, abriendo les puertes al facismu al regala-yos grupu parllamentariu na Xunta Xeneral
El recién ataque a la productora n’asturianu Cuatro Gotes nun ye una casualidá. Enantes les menacies del españolismu más ranciu algamaron al diputáu Adrián Pumares. Y primero Vox menació a Andecha Astur, desixendo la so illegalización. Comu se ve, l’antiasturianismu na so versión facista cabalga de nueu.
Andecha Astur solidarízase con Cuatro Gotes y col so alministraor, Inaciu Galán, y tamos convencíos de que, darréu, siguirán dedicando toles sos fuercies a normalizar la nuesa llingua nacional.
En tou casu ye mester aparase a reflexonar sobro la sucesión d’esti tipu d’ataques, qu’unes vegaes proceden direutamente de Vox y otres del so entornu más averáu. Esti determín de la estrema drecha de señalar falantes d’asturianu, partidarios de la oficialidá y defensores de los drechos del Pueblu Asturianu, entamó conocese namái qu’a Vox se-y regaló grupu parllamentariu propiu na Xunta Xeneral.
Esi regalu a la estrema drecha féxolu otru partíu español, el PSOE d’Adrián Barbón, nun xestu ensin precedentes nos parllamentos europeos de cualisquier ámbetu. Poro, tenemos de señalar a la FSA-PSOE y al presidente Barbón comu responsables d’esti clima de señalamientu y ataque a presones y organizaciones, pol solu fechu de que defendan l’asturianu o los drechos nacionales d’Asturies. Foron la FSA-PSOE y Adrián Barbón quienes regalaron a Vox recursos económicos, homanos y materiales que se paguen colos impuestos de toles asturianes y asturianos. Foron la FSA-PSOE y Adrián Barbón los que regalaron a Vox carraos de visibilidá política y repercusión mediática.
Poro, pidimos a la ciudadanía asturiana que nun escaeza la responsabilidá que la FSA-PSOE y Adrián Barbón tienen nos fechos que vienen asocediendo y que se prepare pa desixir qu’esta socialdemocracia española qu’abre puertes al facismu pague la so responsabilidá política nes prósimes elleiciones.
