Inicio > Asturies > Andecha Astur pidi que la solidaridá pa con Notre Dame s’estienda al padremuñu asturianu
AsturiesCultura asturianaMás noticiesPortada

Andecha Astur pidi que la solidaridá pa con Notre Dame s’estienda al padremuñu asturianu

Dende Andecha Astur somos mui coscientes de la emportancia de los monumentos hestóricos comu parte fundamental de la cultura ya la identidá d’una nación, polo qu’aprofitando la fola de solidaridá pa col padremuñu pidimos la recostrución de los nuesos monumentos en desaniciu

De magar el dramáticu incendiu de la más emblemática catedral francesa, mil millones d’euros apaecieron de la nada pa restaurar lo que, nun vamos ponelo en dulda, yera una impresionante obra d’arquiteutura, testigu de la hestoria francesa y europea y ñeru d’arte.

Solicitamos a les alministraciones, particulares, amantes del arte y la hestoria d’Europa, asturianos en xeneral y benefactores dellos qu’estiendan la so desolación pol esbarrumbe a dalguna de les ruines asturianes que precisen de rápida inversión si nun se quier que desapaezan definitivamente nos años vinientes.

La Torre de Soto, n’Al.ler, los monasterios de San Antolín de Bedón, en Llanes, San Salvador de Curniana y el de Santa María la Real d’Obona, en Tinéu, el palaciu los Faes de Miranda, en Carabanzo (L.lena), la casa los Bernaldo de Quirós, en Candás, el Palaciu de Faes, en L.lena o la ilesia de San Cipriano, en L’Infiestu, y la de San pedro de Plecín, en Peñamellera Alta son dalgunes suxerencies a restaurar. Ensin escaecer tol prerrománicu asturianu, los castros, los horros y les paneres.

La desapaición d’estos monumentos nun implica namás una perda arquiteutónica y artística d’enorme trescendencia, sinon que con ellos piérdese la posibilidá d’afondar na hestoria d’Asturies y de caltenela en pie pa xeneraciones venideres.º

Deja una respuesta

Tu dirección de correo electrónico no será publicada. Los campos obligatorios están marcados con *