Andecha Astur fai un llamamientu a la participación na XXI fiesta de la Oficialidá de Bimenes que se cellebra esti prósimu sábadu 1 de xunetu.

L’exemplu del Ayuntamientu Bimenes, declarando la oficialidá del asturianu y calteniéndola pesia les presiones y represiones, costitúi un exemplu de coherencia y una referencia obligada cara a avanzar pasu ente pasu na reconocencia de los drechos llingüísticos del Pueblu Asturianu.

Na situación d’anguañu, na que PP y PSOE siguen calteniendo’l modelu de represión llingüísticu que carecemos, y Podemos-IU nun acaben de francer cola so política de xestos ensin fechos, mentes Foro y C’s pretender pasar inalvertíos nel conflictu y dexar que too siga igual, el camín de la oficialidá pasa necesariamente por forciar a que los que dicen defender la nuesa llingua, Podemos-IU principalmente, sigan l’exemplu de conceyos como Bimenes, y apreben Ordenances Municipales d’Oficialidá ellí onde o bien formen parte’l gobiernu o tienen capacidá pa condicionalu, lo que supondríe que’l 70% de los asturianos podríemos ver reconocía la nuesa llingua nacional a nivel de conceyu.

Esti forciar a que Podemos-IU cumplan cola so pallabra, que nel so momentu definimos como “Oficialidá, ye tiempu de fechos”, yá ta dando los sos primeros resultaos y de magar entamemos con ello yá s’aprebaren estes ordenances en Mieres y Llaviana. Falten agora polo menos los conceyos de: Castrillón, Grau, Illas, Llangréu, Riosa, Teberga, Uviéu, Xixón.

Dende Andecha Astur nun podemos dexar d'esmolecemos pol averamientu en forma y fechos de les dos formaciones polítiques españoles, PSOE y Podemos, procesu nel que nun duldarán n’utilizar una vegada más a Asturies como moneda de cambeu.

Tando nidiu’l procesu de pasoquización de la formación “socialista” nel que los mayores de 50 años nun camuden el so votu del PSOE (faiga lo qu’esti faiga) demientres que pierde los votos de menores d’esa edá, paez que nel partíu de Pablo Iglesias Turrión camienten que la única manera d’atropar los votos de mayores de 50 ye’l pasoquizase ellos mesmos, cediendo de les sos teóriques posiciones aniciales y averándose al PSOE.  Pa que Podemos algame tolos alcuerdos que ñecesita p’algamar la so cuota de  poder nel Reinu d’España necesita de los sos complices, y pa ello nun tienen problema en facer “tabula rasa” con tolo acontecío nel nuesu país, que naide pague pol marafundiu d’El Musel, tragar colos casos de Villa y tola corripia “sociata” que carecemos nel nuesu país dende 1982 fasta anguañu, permitir la permanencia d’Areces nel Senáu Español, recibiendo’l so pagu polos servicios apurrios al Estáu colonial, entantu tolos sos collacios de la FSA siguin impunes polos milenta millones de los fondos mineros que finaron nes manes de los sos collacios (cuando non del partíu) ensin aportar al so destín, que yera l’espoxigue’l pueblu asturianu pola mor de la desindustrialización…

Llucía Fernández: "Na situación de boicó informativu que carecemos, les redes sociales costitúin una ferramienta de trabayu imprescindible"

La responsable de redes sociales d'Andecha Astur valora perpositivamente'l xorrecimientu de la presencia d'Andecha Astur nes redes sociales, poniendo como exemplu'l de twitter, que nos postreros seyes meses, consiguió perpasar los 2.000 seguidores "Y lo que ye muncho meyor, que la xente interactúe, que dea la so opinión y que mos faiga entrugues" comenta Llucía Fernández.

"Agora mesmo'l seguimientu informativu polos medios de comunicación de les iniciatives actividaes y propuestes d'Andecha Astur ye práuticamente nulu, ye más, daqué mediu usa la información que-y apurrimos ensin citamos ensiquiera, o incluso atribuyéndolo a otres organizaciones. El casu d'El Musel por exemplu ye escandaloso ver como se mos ningunea. NInguneárenmos nun entamu cuando presentemos la denuncia na OLAF, cuando ganemos la denuncia, cuando requerimos l'actuación de la fiscalía, cuando se obligó a actuar a la fiscalía..., asina ye como consiguen que nun podemos rentabilizar el nuesu llabor, y por eso ye imprescindible cuntar coles redes sociales."  Nel mesmu sen tamién resaltó qu'esiste una auténtica militancia nes redes sociales qu'aída enforma a esparder los nuesos conteníos, consiguiendo que la so repercusión seya muncho mayor.

Resulta inalmisible que se mos quiera vender como positives y esperanzaores dos midíes que, na so aplicación, rocen el surrealismu. Ya  lo viemos venir cuando se fizo l’anuncia del usu del asturianu como llingua vehicular, mui guapo, pero mentira, puru posturéu. Teníemos razón. Agora aporta la reforma que tendría de favorecer la incluxón del asturianu n’educación infantil: lo mesmo, semeya pa la galería ya enfotu nulu.

Que los nuesos fíos depriendan na so propia llingua abulta un drechu indiscutible a estos altores de la historia y la obligatoriedá de falar a la reciella na so llingua materna nos primeros años d’escolarización ta recoyía en toles lleis educatives, arriendes de na Llei d’usu y promoción del asturianu, aprebada nel 1.998. La necesidá llegal d’aplicar esta cabera foi la qu'emburrió a redautar un artículu rellativu a la enseñanza del asturianu na etapa infantil.

La reforma lléndase práuticamente a un oxetivu curricular, ambiguu ya incompletu: «Descubrir y participar en dalgunes manifestaciones sociales, culturales y artístiques del so alrodiu, desendolcando una actitú d’interés y apreciu faza’l padrimoniu cultural asturianu y, nel so casu, el padrimoniu llingüísticu”. 

La reivindicación de la Soberanía y el 25 Mayu de 1808 protagonizaron el XX Díi d’Andecha.

La cellebración del Díi d’Andecha, yá na so vixésima edición, ye un momentu perafayaízu d’alcuentru ente la militancia y los simpatizantes de la organización, que comparten una xornada de xermandía y qu’aprofiten p’aldericar sobro estremaos aspeutos de la política asturiana, na que’l Secretariu Xeneral fai una valoración de la llinia política a siguir, y de comu se va espresando esta nel díi ente díi de la organización, y sobro manera énte la sociedá asturiana.

Esti añu’l protagonismu túvolu’l 25 Mayu como espresión d’una Soberanía que tenemos que recuperar, y qu’hai qu’evitar que se terxiverse, ello asina, arriendes de la propuesta ente la Xunta Xeneral pa que reconoza de forma oficial los fechos y los conteníos del 25 M de 1808, tamién se rializó un actu d’homenaxe a les puertes de la Sala Capitular, onde la Xunta Xeneral, convertía en Xunta Suprema pola presión del Pueblu Asturianu, declaró la soberanía ya independencia en 1808, tomando les midíes polítiques efeutives pa faela efeutiva, talo como la formación d’un exércitu asturianu o l’unvíu d’embaxaores a Inglaterra.

Na interveción d’Arturu Xosé Bermeyu remembráronse esos fechos hestóricos, la forma en que se repitieron tovía nel sieblu pasáu coles declaraciones d’independencia de 1934 y 1937, y recordó que la Soberanía ye la única alternativa posible pal futuru d’Asturies “Igual que la Oficialidá ye imprescindible pa recuperar la llingua, la Soberanía yelo pa poder vivir y trabayar dignamente n’Asturies”.

Nesi sen continuó la so intervención afitando’l compromisu d’Andecha Astur cola recostrución nacional y social d’Asturies y la llucha firme escontra “un Estáu que conderga a Asturies al esaniciu, con polítiques represives nel tarrén cultural, y de destruición del texíu socio-económicu asturianu que conderga a la sociedá asturiana a la precariedá, el paru  y la emigración forciada”.