Como vien faciendo coincidiendo colos aniversarios de la declaración de Soberanía de 1808 Andecha Astur presentó na Xunta Xeneral del “Principado” una propuesta pa que “asuma los fechos hestóricos y los conteníos políticos d’aquel 25 mayu de 1808, aprebe una resolución afitando que la soberanía reside nel Pueblu Asturianu y oficialice la cellebración istitucional d’esta fecha como espresión y reivindicación del drechu a decidir que mos correspuende como Pueblu”.

La propuesta que torna a presentase ca 25 Mayu enxamás nun mereció rempuesta nin dengún interés nin pol "Principado" nin por dengún de los grupos con representación parllamentaria, que coinciden na ñegación y tapecimientu d'esta parte de la hestoria asturiana na que la Xunta Xeneral del Principáu, baxo la presión del Pueblu Asturianu, declárase Xunta Suprema, y reconoz la soberanía popular asturiana declarándose una nación independiente del reinu d'España.

Dende la rialidá que carecemos anguañu, con una istitución -el "Principado"- y un Estatutu impuestos dende Madrid, la reivindicación d'esti primer actu d'autodetermín d'Asturies na dómina contemporania ye especialmente importante dao la necesidá que tenemos d'afitar que la Soberanía reside nel Pueblu Asturianu, y superar l'actual marcu xurídicu-políticu que supón l'Estatutu impuestu y la propia Costitución española que ñega'l nuesu drechu a decidir llibremente'l nuesu futuru políticu.

El prósimu sábadu 26 de mayu Andecha Astur cellebra'l XXI Díi d'Andecha reivindicando la declaración de Soberanía de la Xunta Suprema

Coincidiendo cola cellebración del 25 Mayu, Andecha Astur cellebra la xornada de la organización, na qu'al empar d'afondar nel compromisu de la militancia d'Andecha, reivindicaráse la declaración de Soberanía de la Xunta Suprema en 1808 como primer actu d'autodetermín d'Asturies na dómina contemporánia faciéndose un actu d'homenaxe a la mesma cola colocación d'un ramu lloréu a les puertes de la Sala Capitular onde tuvo llugar la mencionada declaración de Soberanía cola qu'Asturies recuperó la independencia.

Dende un entamu, el Díi d’Andecha tuvo vinculáu al 25 mayu, cellebrándose davezu’l sábadu posterior a esa fecha, siempres reivindicada dende’l nacionalismu asturianu. Nesta XXI edición afondaráse nesa vinculación aprofitando pa reclamar como aquel entós la superación d’un Estatutu d'Autonomía y un “Principado” impuestos dende Madrid, qu’enxamás nun fueron llexitimaos en referendum pol Pueblu Asturianu, y del actual marcu llegal que representa la Costitución española que mos torga a les estremaes naciones del Estáu español el llibre exerciciu del nuesu drechu a decidir.

Nel manifestamientu convocáu polos sindicatos CNT, CGT, CSI y SUATEA denunciemos la precariedá, la represión y la discriminación llaboral de xéneru.

VER SEMEYES

La movilización ye la única rempuesta posible frente a un Estáu y un gobiernu que nun respeten nin la so propia llexislación en materia llaboral  y qu’aplica n’Asturies una política d’esfarrapamientu del texíu socio-económicu-industrial que fuercia a la emigración y que  caltién a bona parte de la población asturiana nuna situación de precariedá y probitú inaceutable, entavía más marcada nel casu de la muyer, que nel nuesu país carez una inxustificable discriminación en tantu a la so condición d’asturiana, muyer y trabayaora.

Andecha Astur llama a la participación nel manifestamientu convocáu nel Díi de les Lletres Asturianes defendiendo una Oficialidá ensin complexos y ensin plazos.

Nunos intres nos que la reconocencia de los drechos llingüísticos del Pueblu Asturianu preséntensemos ca vuelta más prósimos, cola Oficialidá de la nuesa llingua nacional como primer pasu, Andecha Astur llama a movilizase nesti Díi de les Lletres Asturianes por una Oficialidá dafechu, denunciando los intentos de vaciala de conteníu colo qu’agora tan dando en llamar una oficialidá “amable”, “a plazos” o “a l’asturiana”.

La Oficialidá nun ye negociable, ye un drechu humanu internacionalmente reconocíu que se mos ta ñegando a los asturianos y asturianes y que nun almite medies tintes. Nun vamos entrar nel xuegu del “costu que pueda tener”. El costu imensu ye’l qu’agora mesmo carecemos con una represión llingüística sistemática y nuna situación d’esaniciu de la nuesa llingua.

Andecha Astur sofita la convocatoria fecha pola Xunta la Defensa la Llingua Asturiana pa desixir la Oficialidá de la llingua nacional d’Asturies

Andecha Astur ye l’únicu partíu qu’hestoricamente, dende l’entamu ya ensin dubies nin arrodios defende la llingua asturiana tanto a nivel revindicativu como de fechu, siendo los únicos que presentamos les papeletes pa les elleiciones na nuesa llingua –ganando nel Tribunal Costitucional el podre exercer esi drechu-, por más qu’en munches ocasiones –como foi nes pasaes elleiciones nacionales- ello supunxera la retirada de les nueses papeletes,  polo que ta nidio que sofitamos el manifestamientu convocáu pal 21 d’abril en defensa de la llingua nacional, asina comu’l viniente que coincidirá col Díi les Lletres.

Afalamos a tola población asturiana a acudir al manifestamientu que se cellebrará n’Uviéu el prósimu sábadu 21 d’abril pa desixir el reconocimientu llegal de los drechos llingüísticos de los asturianos y afalamos igualmente a tolos partíos políticos y asociaciones que participarán na convocatoria a pasar del posturéu a la aición, concretamente a nivel de Conceyu, onde en cuentes d'aprebar "proposiciones de apoyo" que nun van a dengún llau ye preciso aprebar Ordenances que garanticen los drechos llingüísticos de los vecinos; arriendes d'emplegar l’asturianu nes sos comunicaciones y poniendo los medios al so algame pa que la Oficialidá seya un fechu.