Inicio > Asturies > «Sexu, Mentires y cintes de videu»
Asturies

«Sexu, Mentires y cintes de videu»

 Rempuesta d’Andecha Astur al discursu de fin d’añu de Javier Fernández

Finamos 2018 con una edición navidiega del ciclu cinematográficu “Pior imposible”, col pase públicu de la película “Sexu, mentires y cintes de vídeu”. Nesta ocasión la cinta protagonízala Javier Fernández, presidente cesante del “Principado de Asturias” pola famiglia’l PSOE; sicasí, ye una versión orixinal del guión porque recórrese’l títulu del revés, entamando por cintes de vídeu y finando con sexu. Vamos velo…

A falta d’una cinta vídeu, hai dos: una nesti periódicu y otra nesti otru periódicu, anque dambes son iguales. Nelles apaez el presidente Fernández echando l’avezáu discursu istitucional con motivu del añu nueu. Por si daquién nun lu lleó a tiempu, pue consultar equí’l testu íntegru’l so discursu. Aconseyamos la so lletura. Nós nun somos de los que censuramos mensaxes políticos.

Coherente cola práutica política de la famiglia’l PSOE, el monólogu navidiegu que se marca’l presidente Fernández ta apináu mentires.

 

Mentira 1 – Diz que’l PSOE siempres tien mui presente a la “Asturies del esterior”. Señor Fernández, nun hai Asturies del esterior, ye mentira. Na Alemania nazi los miles de presones que tuvieron de salir del país nun podíen ser calificaos comu “Alemania del esterior”. Lo qu’hai son 276.166 asturianes y asturianos qu’ente los años 1991 y 2017 foron obligaos a espatriase d’Asturies escontra la so voluntá, y foron obligaos poles polítiques económiques y sociales etnocides de los gobiernos sucursalistes presidíos por Juan Luis Rodríguez-Vigil Rubio (PSOE), Antonio Ramón María Trevín Lombán (PSOE), Sergio Rutilio Marqués Fernández (PP), Vicente Alberto Álvarez Areces (PSOE), Francisco Álvarez-Cascos Fernández (Foro) y el mesmu Javier Fernández Fernández (PSOE), sofitaos en munchos casos por Izquierda Unida o, esti mesmu añu, por Podemos (que-y aprebó los presupuestos, señor Fernández).

 

Mentira 2 – Diz que’l PSOE  tien nel primer llugar del so esmolecimientu a los trabayaores d’Alcoa. Señor Fernández, ye mentira. Los gobiernos sucursalistes que tuvo Asturies siempres se plegaron a les grandes llínies estratéxiques decidíes pol gobiernu español en materia d’economía ya industria. Usté nun pue dicir que nun-y esmolez la situación llaboral n’Alcoa, ye ñidio, anque sólo seya pola so propia sobrevivencia. Pero los sos polítiques foron siempres consentir sofitos a la gran industria ensin poner llendes a los apetitos descomanaos de los grandes consorcios tresnacionales. Alcoa va colar porque l’Estáu español, y usté comu fiel sirviente, lo permiten. Poles mesmes polítiques económiques ya industriales que favorecen los intereses de les grandes empreses enerxétiques. Poles mesmes razones qu’Asturies ye yá una nación ensin mineros (magar los esfuercios d’Adrián Barbón por tapecer la rialidá con más mentires). Poles mesmes razones que se-y permite a ALSA condicionar la política de comunicaciones n’Asturies, qu’Asturies ye l’únicu país la península ensin una salía gratuita per autopista (sinón que ca añu ye más cara), que nun tenemos llínies de ferrys haza l’esterior, que nun tenemos llínies ferroviaries rápides y dines haza l’esterior, que les llínies ferroviaries de cercaníes tán abandonaes dafechu, que tamos aisllaos en materia de vuelos d’avión (magar que los gobiernos sucursalistes que tuvimos dispunxeron de 5.100 billetes aéreos gratuitos, de llibre distribución pa pagar silencios y llealtaes, ¿eh, pillines?).

 

Mentira 3 – Diz que’l caltenimientu l’emplegu y la llucha a la escontra’l paru son la so prioridá’l PSOE; y que pervese na so “comunidá autónoma” una progresiva y continuá recuperanza económica. Miente, señor Fernández. Miente porque la política económica que desendolquen los partíos españoles son los que ficieron qu’Asturies finare 2017 con 78.884 paraes y paraos; los datos de 2018 entá son provisionales pero tamién superen los 70.000. Pero ye que más del 36 % la tasa’l paru cébase na mocedá de menos de 25 años. Y en 2017 el 90’56 % de los contratos fechos yeren por obra o sirviciu, eventuales o interinos; mentantu que sólo’l 4’55 % los contratos foron indefiníos. Sólo 2 de ca 10 moces o mozos asturianos tienen emplegu; Asturies ta castigá cola tasa d’actividá moza más baxa de tol estáu y la tasa de precariedá más alta. Estes polítiques económiques de los partíos españoles obligaron a 41.600 asturianos ente 16 y 29 años a abandonar Asturies sólo nos caberos diez años. Miente, señor Fernández, porque PSOE y PP (cola complicidá de salón de la esquierda estatalista/reformista) son los culpables de que, dende 1977, Asturies seya l’únicu país del estáu que nun pudo doblar el so PIB.

 

Mentira 4 – Diz que sofitar un modelu económicu namái nel turismu fadríamos mui vulnerables. Miente, señor Fernández. Porque PSOE y PP (y el cómpliz esquierdismu españoliegu de salón) son los culpables de que la distrubución del Valor Brutu Amestáu d’Asturies seya del 16 % n’agricultura o del 16’8 % n’industria, mentantu que ye del 69’1 % nel seutor sirvicios. Miente, porque tán desencadarmando la nación asturiana pa convertila nun “Paraísu Ñatural” a esplotar turísticamente, un país apináu de camareres y camareros que sirvan riojas a los visitantes.

 

Mentira 5 – Diz que, p’atayar la “sangría poblacional” d’Asturies el PSOE ya consiguió incluyir esta tema nuna axenda estatal (tiénenlo axendao, vamos), firmó alcuerdos con otres “autonomíes” (que son igualmente sierves cómplices) y qu’afaló “estremaes iniciatives” (que nun desplica). Miente, señor Fernández. Ente 1991 y 2017 Asturies menguó la so población nun 5’39 %, mentantu que l’estáu español xorreció nun 19’80 %. Miente porque nun-yos importa un res el futuru d’Asturies. L’Estáu español y les sos “autonomíes” (tamién la qu’usté preside) gastaron munchísimos millones d’euros más en sovencionar consorcios tresnacionales industriales, en compensar los intereses dañaos de los grandes bancos, en compensar los robos tremendos asocedíos nes antigües caxes d’aforros, en disviar al seutor priváu munches prestaciones públiques básiques (sanidá, enseñu, tresportes, correos…), en corruciones consintíes de toa triba… que n’atayar la “sangría poblacional”, que nun ye sinón una política etnicida (Asturies ye una de les víctimes) cola que se pretende rediseñar el territoriu estatal pa una nuea fase d’esplotación capitalista. 

 

Mentira 6 – Diz que ye una necesidá dexar el problema poblacional “fora la lucha partidista”. Miente, señor Fernández. Nun ye “una necesidá”. Ye lo qu’usté y los partíos españoles necesiten. Porque ustés son los responsables de les polítiques económiques, industriales, culturales… que conducen a esti drama poblacional. Y si escaeciéremos eso nel debate políticu, blanquearíamos la so terrible responsabilidá nesti etnocidiu al que se ta emburriando al pueblu asturianu.

 

Mentira 7 – Diz que la política del futuru nun ye demoler la Transición, nin colocar na axenda nacional asturiana y na axenda española reclamaciones de billateralidá o estatus nacional. Miente, señor Fernández. Porque precisamente lo que ficieron los partíos españoles, comu’l de so, na Transición foi blanquiar les responsabilidaes criminales del réxime franquista y permitir la so reformulación nun nueu réxime capitalista de meyor cara, a cambiu de tener usté drechu a danzar nos salones doraos del nueu estáu español ellí surdíu baxo la fórmula d’una monarquía. Avalaron la conversión d’una dictadura criminal y corrupta nun réxime hereditariu igualmente corruptu. Ente’l poder militar de Franco, honor y gloria al poder testicular de los Borbones, mentantu haiga panchón pa toos. Pero sabe usté, señor Fernández, qu’Asturies yá prebó tolos rexímenes españoles posibles (monarquíes asolutes, repúbliques lliberales, repúbliques d’esquierda populista, dictaúres militares, monarquíes barnizaes de democracia…). Y con dengún d’ellos se mos permitió escoyer el nuesu futuru. L’estáu español, embaxo les sos estremaes formulaciones, ye’l culpable de tener a Asturies na situación d’anguañu. Y usté ye un responsable más d’ello.

 

Mentira 8 – Diz que se tien de reconocer l’Estáu’l Bientar que se da n’Asturies y que s’alvierte, diz, nos sos colexos, nes sos escueles rurales, nos sos centros de salú y nos sos hospitales. Miente, señor Fernández. Entrúgue-y a Tini Areces, a Riopedre o a María Jesús Otero cuála ye l’apuesta del PSOE pola enseñancia pública, especialmente pola so financiación. Sabe usté, amás, que foi’l PSOE quien condergó a la sobrevivencia marxinal a la escuela rural obligando a tresllados prematuros a los istitutos y suprimiendo cientos y cientos d’escueles rurales. Sabe usté perbién fasta qué puntu reconvirtieron la sanidá pública: recortando plantilles, derivando sirvicios al seutor priváu, llimitando melicaciones sovencionaes, perdiendo sospechosamente cifres millonaries en sobrocostes de grandes istalaciones hospitalaries, nun atayando’l problema de les llistes d’espera, etc.

 

Mentira 9 – Diz que… Non, nesti casu nun diz ná. Nel so discursu nun fala gota del réxime de corrrución que cabalga sueltu per Asturies. Miente, señor Fernández. Nun falar anguañu de la corrución que protagonicen y tapecen tamién ye mentir. Casu Marea-Riopedre, casu Villa/SOMA/PSOE, casu El Musel, casu Niemeyer, casu Aquagest y munchos más casos. Los partíos españoles nun quieren falar de “supuestes” y non tan supuestes imputaciones qu’enllenen los xulgaos: prevaricación, fraude, esaciones fiscales, malversación de caudales públicos, cohechu, blanquéu capitales, falsedá en documentos oficiales y mercantiles, fraude de sovenciones, tráficu influyencies, delitu societariu por apropiación indebío, delitu escontra la facienda pública… El réxime políticu vixente ye il padrino d’esta gran famiglia que pasea pelos xulgaos, de forma impune en demasiaes ocasiones.

 

Mentira 10 – Diz que la política del gobiernu sucursalista que carecemos ta defendiendo lo que ye de toos. Miente, señor Fernández. Comu queda dicho, el réxime políticu vixente ta dedicándose a esplotar, malvender o direutamente a robar lo que ye de toles asturianes y asturianos. Asina ye que, en delles ocasiones, nes grandes ciudaes del centru asturianu nun s’estrema ente’l tufu a contaminación y el fedor d’un réxime descompuestu ente corrución, caducu.

 

Cintes de vídeu, dos polo menos. Mentires, diez polo menos. ¿Y el sexu?

Pos el sexu ye según los casos. El catálogu de posibildaes va dende l’onanismu de los despachos oficiales (col discursu español de qu’Asturies gocia d’un estáu’l bientar que meyora too siguío), fasta les “perversiones” que sofre’l pueblu asturianu (cuandu-y tán dando per tolos llaos).

Poro, señor Fernández, agora que dio’l so caberu discursu de fin d’añu, sólo-y podemos dicir una cosa a usté y otra al PSOE. Y vamos dicí-yosles n’inglés, porque, polo visto, la llingua d’Asturies pescáncienla malamente, amás de prohibir la so oficialidá.

Al señor Fernández: Game over.

Al PSOE: Insert coin. Pero munchos, munchos coins. Vamos, que retorne a los presupuestos públicos asturianos tolos millones d’euros desapaecíos perhí. Sí, sí, a esos presupuestos qu’acaben d’aprebar PSOE, IU y Podemos; por cierto, ensin que Podemos s’alcordare de pidir n’Asturies l’auditoría de tresparencia económica que prometía nel so programa pa les alministraciones públiques, empreses con participación pública en capital, consorcios ya istitutos públicos. Claro qu’igual votaron los presupestos del PSOE con una man mentantu tapaben les ñarices cola otra, nun se televisó bien eso.

En fin, lo dicho: Game over. Insert coin.

Deja una respuesta

Tu dirección de correo electrónico no será publicada. Los campos obligatorios están marcados con *