Inicio > Asturies > La Fiscalía Superior investiga la denuncia d’Andecha Astur a Barbón por prevaricación y cohecho
AsturiesPortada

La Fiscalía Superior investiga la denuncia d’Andecha Astur a Barbón por prevaricación y cohecho

Denuncióse a Adrián Barbón por poner el cargu Presidente y el Palaciu presidencial al sirviciu los intereses d’una campaña promocional de “La Nueva España”.

La Fiscalía Superior d’Asturies acaba comunicar a Andecha Astur que tien abiertes dilixencies pa esclariar la denuncia que presentemos escontra Adrián Barbón, por poner el cargu Presidente y el Palaciu presidencial al sirviciu los intereses d’una campaña promocional de “La Nueva España”. La denuncia qu’agora s’investiga inclúi l’acusación de dos supuestos delitos: prevaricación y cohechu.

Barbón tendría prevariao por convertir la figura’l Presidente nel oxetu-premiu d’un concursu promocional d’una empresa editorial privá (la del diariu La Nueva España), faciendo de guía sólo y esclusivamente pa dos grupos de lletores del diariu nuna visita al Palaciu Presidencial. Ye tamién un supuestu delitu de prevaricación el fechu de que’l Presidente ceda pa intereses privaos, promocionales y llucrativos, un edificiu públiu d’usu oficial y restrinxíu, comu ye’l Palaciu Presidencial.

Na denuncia que s’investiga acusábamos a Barbón de “pervertir la dinidá, les fonciones llegales y la categoría d’autoridá pública que tien el cargu de Presidente del Gobiernu asturianu, convirtiendo esta figura en mercancía comercial y oxetu promocional, sometiéndolu al porgüeyu d’una empresa privá”.

Pero tamién s’investiga si hebio delitu de cohechu, esto ye, si Adrián Barbón tomó’l determín de prevaricar, tan dafechamente contrariu a los deberes del so cargu, de forma desinteresá, o si pa ello solicitó o recibió dádives comu contraprestación a los favores, supuestamente illegales, qu’él facía a una empresa privá.

Andecha Astur considera llamentable y perxudicial pa la salú democrática d’Asturies que la so denuncia fore la única reación social y política a los fechos protagonizaos por Adrián Barbón. La sociedá asturiana tien de tomar nota de cómu a los partíos españoles nun-yos esmolez gota que’l Presidente d’Asturies utilice’l so cargu y venda la so dinidá istitucional pa porgüeyu d’empreses privaes.

Deja una respuesta

Tu dirección de correo electrónico no será publicada. Los campos obligatorios están marcados con *