La participación d’ANDECHA ASTUR na coalición AGORA REPÚBLIQUES con otres formaciones soberanistes -ERC, EH Bildu, BNG, Puyalón, Ahora Canarias- permítemos ufrir una alternativa política que proporcionará al Pueblu Asturianu’l mediu de tener voz propio en Madrid
Ello asina, queremos comprometemos col Pueblu Asturianu afitando unos puntos básicos nos que cientraremos tol nuesu enfotu y esfuerciu, respondiendo asina a les necesidaes de la sociedá asturiana:
- Defendemos los drechos sociales de les asturianes y asturianos, organizaos na forma d’una República asturiana, soberana y socialista.
- Defendemos una Asturies ensin corrución, llibre de les polítiques d’austericidiu económicu y precariedá llaboral con que mos castiga l’Estáu español y la Xunión Europea.
- Defendemos la redistribución de la riqueza, una fiscalidá xusta, una renta ciudadano garantizao y l’atención de les necesidaes básiques de la población.
- Defendemos una nuea política de rellaciones llaborales: trabayu dignu, salariu suficiente, garantíes efeutives escontra la siniestralidá y procesos de negociación sofitaos nos conceyos abiertos de trabayaores.
- Defendemos polítiques actives d’aída a la mocedá asturiano pa garantiza-y un futuru nel so país, asina comu pa la comunidá asturiano que se vio forciao a emigrar.
- Defendemos la igualdá de toles presones, ensin diferiencia por identidá de xéneru, opción sesual o modelu convivencial.
- Defendemos la oficialidá del asturianu comu llingua nacional, asina comu’l nuesu padremuñu hestóricu, cultural ya ecolóxicu.
