Inicio > Asturies > La Ministra d’Igualdá torga l’asturianu nel 016 pero reconoz el Mandinca y otres 52 llingües
AsturiesLlingua AsturianaPortada

La Ministra d’Igualdá torga l’asturianu nel 016 pero reconoz el Mandinca y otres 52 llingües

El diputáu Jon Iñarritu, del grupu EH Bildu y de la coallición Agora Repúbliques na que ta integrá Andecha Astur con otros grupos nacionaliegos del estáu, presentó una entruga per escritu a la Ministra española d’Igualdá, Irene Montero (Podemos):

“¿Qué iniciatives camienta tomar el Ministeriu pa respetar dafechu los drechos de les muyeres maltrataes d’Asturies permitiéndo-yos alcontrar proteición al traviés del teléfonu 016 ensin ver entá más dañaos la so dinidá y drechos por espresase en llingua asturiana y pa que nun seyan pior trataes polos sirvicios d’esi Ministeriu que les muyeres falantes de soninké, wolof o mandinca?”.

La entruga ye una forma de denunciar un pasu más na represión llingüística que carecez Asturies, esta vegá direutamente dende un ministeriu xestionáu por Podemos. No cabero de mayu la ministra Montero presentó la prósima axudicación pa la xestión del teléfonu 016, dedicáu a l’atención de les víctimes de xéneru.

Nesi condicionáu, el gobiernu PSOE-Podemos desixe que la empresa puea atender a les víctimes en 53 idiomes: euskera, catalán, gallego, español, inglés, francés, alemán, portugués, chino mandarín, ruso, árabe, rumano, búlgaro, afgano, albanés, armenio, bambara, bereber, bosnio, brasileiro, cantonés, checo, coreano, danés, esloveno, eslovaco, farsi, finés, georgiano, griego, hindi, holandés, húngaro, italiano, japonés, lituano, mandinca, noruego, persa, polaco, poulaar, serbocroata, sirio, soninké, sueco, tailandés, taiwanés, tamazight, turco, ucraniano, urdu y wolof.

Pero esclúise la llingua d’Asturies. Nun se trata yá d’una mera represión llingüística, contraria a tola llexisllación internacional y estatal que reconoz el drechu a la non discriminación por mor del idioma. Trátase de qu’amás esta actitú escluyente, castiga específicamente a les asturianes, lo cualo aseméyase demasiao a un delitu d’odiu. Y pue condicionar los drechos a la vida, a la llibertá sexual, a un trabayu dinu… Porque’l 016 yá nun atenderá sólo asuntos de violencia de xéneru, sinón tamién casos de violencia sesual, acosu llaboral, trata con fines d’esplotación sesual y otres temes igualmente importantes.

Fechos comu’l que denunciamos son una preba de qu’Asturies nun gana nunca cola alternancia o sucesión de partíos españoles n’Uviéu o en Madrid. Pervese que les mesmes polítiques de represión llingüística pa con nós son capaces de faceles la drecha cavernícola, la socialdemocracia mafiosa o los alternativos de salón.

La represión llingüística n’Asturies sólo finará cuandu les asturianes y los asturianos algamemos plenu poder nesa materia y s’aprebe la oficialidá. Nesi camín préstamos siguir andechando con toes y toos vosotros.

¡Llingua nacional, llingua oficial!

Deja un comentario

Tu dirección de correo electrónico no será publicada. Los campos obligatorios están marcados con *