Inicio > Asturies > ¡Colos trabayaores d’EBHISA!
AsturiesLlaboralPortada

¡Colos trabayaores d’EBHISA!

Andecha Astur fae públicu’l so sofitu al colleutivu trabayaores de la empresa EBHISA nel puertu El Musel, de Xixón, y la so especial solidaridá colos cuatru compañeros d’esa plantía que tán en fuelga fame dende’l 13 mayu, lluchando dende’l mayor de los compromisos por una solución a un conflictu llaboral que beneficiará a toes y toos.

Señalamos la especial responsabilidá política que nesti conflictu tien el Gobiernu d’Adrián Barbón, dao qu’EBHISA tien comu acionista mayoritariu a l’Autoridá Portuaria de Xixón, qu’al tiempu depende direutamente del “Principado”. Adrián Barbón ye, n’últimu estremu, el responsable de qu’EBHISA prevocare un conflictu llaboral con un ERTE non negociáu y cola previsión de despidir a siete trabayaores, no que nun ye más que l’enfotu de tarazar progresivamente la plantía y ameyorar la cuenta rendimientos del capital.

Nun hai dulda de quién tien la razón nesti conflictu. Los trabayaores d’EBHISA tán defendiendo con dinidá los sos drechos llaborales énte l’Autoridá Portuaria de Xixón, que se dota siempres de presupuestos millonarios pa sueldos y dietes del so Conseyu d’Alministración y que nun ye más qu’otru de los centros de corrución del PSOE n’Asturies. Poro foi denunciá por Andecha Astur énte la Oficina Europea de Llucha escontra’l Fraude y ta siendo investigá por ésta por corrución y malversación de más de 250 millones € nes obres d’ampliación d’El Musel.

Al empar denunciamos comu terrorismu empresarial ya istitucional dalgunes de les formes que la EBHISA y les autoridaes tán tomando pa intentar controlar y reducir el conflictu. Por exemplu, forciar a ún de los compañeros que tán en fuelga fame a reincorporase al tayu pa facer trabayos inapropiaos y d’altu riesgu na so situación. Por exemplu, torgar l’asistencia mélica a los fuelguistes. O comu, otru exemplu, controlar policialmente al colleutivu mediante l’usu drones.

Andecha Astur desixe al Gobiernu del “Principado”, a Adrián Barbón, al PSOE qu’arrenuncien a xugar cola salú de los trabayaores nesti conflictu, que reconozan por coherentes les demandes del colleutivu de trabayaores d’EBHISA Xixón y qu’aprofiten pa sanear ética y políticamente una Autoridá Portuaria, la de Xixón, corruta y ayena a los intereses de la ciudadanía.

Andecha Astur llama a les asturianes y asturianos a sofitar al colleutivu de trabayaores d’EBHISA Xixón participando nes concentraciones diaries de sofitu que se faen na Sablera L’Arbeyal, a les 20’30 h.

 

Xixón, 20 de mayu de 2020

Xunta Executiva d’Andecha Astur

One thought on “¡Colos trabayaores d’EBHISA!

Deja un comentario

Tu dirección de correo electrónico no será publicada. Los campos obligatorios están marcados con *