Inicio > Asturies > Andecha Astur denuncia’l desdexamientu de la Sanidá Pública Asturiana
Asturies

Andecha Astur denuncia’l desdexamientu de la Sanidá Pública Asturiana

La pretensión del “Principado” d’acabar coles llistes de muera con “decretos”, escaeciendo la planificación ya inversión na Sanidá Pública Asturiana ye un fraude que precariza la salú de los asturianos y contribúi a la Privatización de la Sanidá.

Los postreros datos espublizaos pol Serviciu de Salú del «Principado» (Sespa), actulaizaos a 30 payares amuesen como nel Ária Sanitaria V, qu’inclúi a Xixón, esisten 4392 pacientes pendientes d’una operación, cifra namás superada en 2013 tres trés meses de fuelga mélica n’Asturies. De fechu, del añu pasáu a esti hai 911 enfermos quirúrxicos más, pesia’l «decretu» del «Principado», el restu los datos facilitaos afonden na mesma situación, por exemplu, los 3878 pacientes en muera estructural entarden setenta díis n’operase, diez más que nes mesmes feches de 2017, y el númber de presones qu’esperen la primer consulta ye de 11.876 frente a los 11.745 del añu pasáu. Asina mesmo, hai 986 presones pendientes d’operar en Xove y lo que ye pior, l’Hospital de Cabueñes caltien presllada toa una planta mentes afaya 21 cuartos múltiples, ello ye, ¡tres pacientes compartiendo cuartu!

El nivel de precarización de l’atención sanitaria pública que carecemos los asturianos queda perfechamente espeyáu colo que pasa nesti ária, diendo tovía a más nel oriente y ocidente asturianu, y ensin entrar a valorar la inxustificable falta pediatres, lo que supón en postrer términu qu’hebia de recurrise a la Sanidá Privada pa suplir los efeutos del desdexamientu de la Sanidá Pública.

Ello asina, Andecha Astur acusa al gobiernu del «Principado» de tar xugando cola salú de los asturianos, y contribuyendo a la Privatización de la Sanidá, a base de desdexar la Sanidá Pública, too ello de forma cosciente y programada, mentes los mélicos asturianos vense forciaos a emigrar, y la facultá de melecina y la formación MIR sigue tando n’Asturies mui perbaxo non solo de les necesidaes riales de la sociedá asturiana, sinon tamién de lo que-y corresponderíe por población, de tala miente que comunidaes como Cantabria, con menos de la mitá de población ufierta práuticamente les mesmes places na Facultá Melecina y na formación MIR qu’Asturies.

Deja una respuesta

Tu dirección de correo electrónico no será publicada. Los campos obligatorios están marcados con *