Inicio > Asturies > Barbón usa l’ataque identitariu de Vox pa torgar la oficialidá
AsturiesLlingua Asturiana

Barbón usa l’ataque identitariu de Vox pa torgar la oficialidá

El PSOE quier presentar como conflictu llingüísticu lo que ye una agresión facista de Vox a los asturianos

Cuandu los diputaos facistes de Vox se quexen de nun pescanciar l’asturianu nes sesiones de la Xunta Xeneral, tán cometiendo un agresión llingüística, con intencionalidá política ñidia. Les diputaes y diputaos de Vox atalanten perfechamente a la sociedá asturiana nes cais, nos mercaos, nos tayos… Nun se pue considerar más qu’un insultu y una agresión la postura de “nun entender” una llingua que, comu l’asturiana, tien un nivel tan altu d’afinidá cola española, por derivar dambes del llatín.

Los diputaos españoles nos parllamentos catalán y gallegu nun precisen de midíes especiales por mor de tener una llingua propia. Nun tienen tornaores nin repiten les intervenciones en dos llingües. L’actitú de Vox sólo ye l’amuesa de la so postura radicalmente contraria a la identidá asturiana. Y ello resulta normal nun partíu facista.

Lo que yá ye de traca, ye qu’otru partíu español, el PSOE, supuestamente sensitible pa cola identidá asturiana y que nos papeles diz defender la oficialidá, se dedique a blanquier l’agresión facista, desvistiéndola de la intencionalidá glotofáxica y del imperialismu llingüísticu que tien, pa revestila comu si fore un simple y educáu conflictu d’entendederes llingüístiques.

El PSOE lleva 40 años asitiáu nel bandu los represores llingüísticos d’Asturies, por torgar la oficialidá mentantu gobierna (cola aída del restu la esquierda española, IU y Podemos). Pero la valoración que facemos del PSOE agravaríase notablemente si, amás de torgar la nuesa llingua, va convertir la Xunta Xeneral nun falsu circu onde escenificar problemes inesistentes d’entendimientu llingüísticu, colos que sólo quier alloñar más entá la llegá d’esa oficialidá vehicular pola qu’Asturies lleva tantos años puxando. Llantar intervenciones repetíes en dos llingües o facer entregá obligá d’una torna al español son númberos de pista pa facer creyer que tenemos montáu un circu llingüísticu que, en rialidá, nun esiste.

L’asturianu ye la llingua nacional d’Asturies. Asturies fala asturianu. Facer política n’Asturies supón facese al país, respetar la nuesa identidá, garantizar los nuesos drechos básicos.

Nun facer eso ye agredimos; ye lo propio del facismu: atacamos pola nuesa identidá. Y blanquiar, al estilu’l PSOE, esa agresión comu simple conflictu llingüísticu ye convertise en cómpliz d’esi facismu agresor. Quiciás Vox ta pagándo-y asina a Barbón el favor de que-y concediere grupu parllamentariu propiu. Tristes miseries de partíos españoles.

Asturies precisa superar l’anormalidá democrática na que vivimos, y ver reconocíos drechos tan esenciales como la oficialidá de la nuesa llingua nacional.

One thought on “Barbón usa l’ataque identitariu de Vox pa torgar la oficialidá

Deja una respuesta

Tu dirección de correo electrónico no será publicada. Los campos obligatorios están marcados con *