Inicio > Asturies > Andecha Astur propón a la Xunta Xeneral d’Asturies la cellebración institucional del 24 d’Agostu en reconocimientu del Conseyu Soberanu d’Asturies y Lleón
AsturiesPortada

Andecha Astur propón a la Xunta Xeneral d’Asturies la cellebración institucional del 24 d’Agostu en reconocimientu del Conseyu Soberanu d’Asturies y Lleón

Énte’l xeneral escaezu y/o utilización de la historia asturiana Andecha Astur propón a la Xunta Xeneral y a tolos grupos parllamentarios que la componen un reconocimientu esplícitu de la emportancia de los fechos asocedios na nuechi del 24 d’agostu de 1937, cuando’l Conseyu Interprovincial d’Asturies y Lleón decide costituyise en Conseyu Soberanu d’Asturies y Lleón, asumiendo plena xurisdición y responsabilidá nel gobiernu civil y militar de los sos territorios y costituyéndose de fechu nuna República Asturiana, siendo la cabera istitución democráticamente escoyía pol Pueblu Asturianu.

Nesa condición, los escritos que’l Conseyu Soberanu dirixó dempués a la Sociedá de Naciones (antecedente de la ONU) supunxeron una notificación internacional de la condición soberana del Conseyu d’Asturies y un pidíu de reconocencia internacional pa los drechos políticos y civiles de les ciudadanes y ciudadanos d’Asturies.

Poro, nun pue ñegase la tremenda importancia qu’estos socedíos y la figura de Belarmino Tomás, presidente del Conseyu, tienen na hestoria d’Asturies. Sicasí, una fecha tan señalá nel nuesu calendariu nun tien denguna reconocencia por parte les istituciones asturianes, siendo fasta agora la cellebración entamada añalmente por Andecha Astur en Puertu Tarna l’únicu actu comemorativu d’esti fechu y abultando que, trescurríos yá 82 años de silenciu istitucional, ye preciso iguar lo primero posible esta custión.

Nesi sen Andecha Astur propunxo a la Xunta Xeneral que, por alcuerdu o votación de los grupos parllamentarios que la componen, declare’l 24 d’agostu de ca añu comu fecha de necesaria cellebración istitucional. Nella, la Xunta Xeneral convocará una sesión estraordinaria del so Plenu, nel que se fadrá llectura d’un testu de remembranza de la declaración soberana d’Asturies. Proponemos también que nesa mesma fecha’l mobiliariu que formó parte del despachu de Belarmino Tomás seya treslladáu a la Xunta Xeneral, declarándose esa xornada comu de puertes abiertes pa que la ciudadanía asturiana pueda visitar el despachu del presidente y l’edificiu de lo que debería ser l’ente representante d’una Asturies Soberana.

 

Homenaxe al Conseyu Soberanu esti sábadu 24 en Tarna

Deja una respuesta

Tu dirección de correo electrónico no será publicada. Los campos obligatorios están marcados con *