Inicio > Asturies > Salariu Social ya Ingresu Mínimu Vital
AsturiesLlaboralPortada

Salariu Social ya Ingresu Mínimu Vital

Andecha Astur pide la condonación de la delda pa los afeutaos pol pagu simultániu de Salariu Social Básicu y del Ingresu Mínimu Vital

Ye inaceutable que los más débiles paguen les consecuencies de la ineptitú y mala xestión del Gobiernu de Barbón

De magar la entrá en vigor del Ingresu Mínimu Vital la Conseyería de Drechos Sociales y Bientar del Gobiernu d’Asturies vien dando amueses de la so incompetencia, cola que castiga a aquelles estayes de la población que se supón tien de protexer: los más esfavorecíos.

El caos alministrativu y la desinformación qu’acompangó, dende’l primer intre, el treslláu d’espedientes del SSB al IMV finó con más de 9.000 asturianes y asturianos repitiendo xestiones y viviendo na incertidume de ver nel aire los sos futuros ingresos. Amás, l’alministración asturiana nun foi quién a dar de baxa del cobru del SSB a aquellos beneficiarios qu’entamaron a cobrar l’IMV, ensin que siquiera se-yos informare de la incompatibilidá d’ambos ingresos, polo que 14.000 presones percibieron los dos salarios al mesmu tiempu durante un periodu d’ente 8 y 11 meses, siendo ello que munchos siguen nesa situación.

Los pagos indebíos tienen de ser agora devueltos por unes economíes yá de por sí endexes, que verán dividíos a la metá los sos ingresos y al mesmu tiempu tendrán de facer frente a pagos de fasta 6.000 €, baxo menacia de perda del 100% de los sos ingresos si nun pueden asumir el pagu.

Consideramos inaceutable que seyan los beneficiarios del IMV los que tengan de facer frente a les consecuencies de la ineptitú y mala xestión del Gobiernu de Barbón, que nun supo tramitar correchamente los espedientes nin apurrir la información en tiempu y forma. Poro, dende Andecha Astur desiximos al “Principado” qu’asuma la responsabilidád’estes deldes, procediendo darréu a la so total condonación.

Si l’estrañu modelu de “socialismu” que carecemos en Madrid y n’Asturies pue invertir 126 millones € pa participar nel Conseyu d’Alministración de Duro Felguera, si se pue “perdonar” a la banca más de 60.000 millones € pol so rescate, si se puen marafundiar 25 millones € nuna Cara Real… ¿por qué nun se pue condonar a los más esfavorecíos una delda de la que nin siquier son responsables?

Amás, mentantu’l Gobiernu de Barbón, nun proceda a condonar esa delda, reclamamos conocer el destín d’eses devoluciones del SSB, un dineru que correspondía, según los presupuestos del añu 2020 a atender les necesidaes de los más esfavorecíos al traviés de los Servicios Sociales y que nun pue tener otra finalidá que nun seya ésa.

Nun queremos qu’eses perres acaben formando parte d’un misteriosu fondu B, pos los Gobiernos de la FSA-PSOE son bien poco daos a la tresparencia y bastante aficionaos a marafundiar fondos públicos de formes estrañes. Queremos que se condone la delda, pero, en tou casu, si’l Gobiernu de Barbón escueye una posición puramente capitalista y d’esplotación de los más débiles, desixiremos que la delda cobrá torne íntegramente a asuntos sociales; proponemos, más concretamente, que vaiga destiná a complementar la escasísima aída que representa l’Ingresu Mínimu Vital y a paliar la perda de la Aída por Fiu a Cargu cola que se castiga a les families perceutores del mesmu.

Deja un comentario

Tu dirección de correo electrónico no será publicada. Los campos obligatorios están marcados con *