La Xunta Elleutoral d’Asturies refuga los escritos d’Andecha Astur

Tres 19 años almitiendo los escritos d’Andecha Astur n’asturianu, agora la Xunta Elleutoral d’Asturies, refúgalos, atacando asina la sentencia del Tribunal Costitucional  del añu 2000, ganada por Andecha Astur

Andecha Astur convoca a tolos medios de comunicación a una rueda de prensa esti xueves, 25 d’abril de 2019, a les doce del meudíi na Cafetería del Hotel Fruela

Paulo Arboleya Canteli, secretariu xeneral de organización política Andecha Astur, convoca a los medios de comunicación a esta rueda prensa, na que se fadrá pública una increyible comunicación qu’Adecha Astur vien de recibir de la Xunta Elleutoral d’Asturies. La mesma Xunta Elleutoral que demientres los caberos 19 años acató respetuosamente la sentencia del Tribunal Costitucional sol usu l’asturianu nos procesos elleutorales -ganada por Andecha Astur- la mesma Xunta Elleutoral que vien de validar les nueses papeletes de votu en llingua asturiana pa les elleiciones estatales d’abril, ye la qu’agora mos ñega’l drechu a siguir comunicándomos con ella na nuesa llingua, colo que pasa d’acatar a atacar la mentá sentencia’l Costitucional.

Andecha Astur tien el convencimientu de que l’escritu qu’agora mos refuguen yelo presisamente pol so propiu conteníu, que se dará a conocer na rueda prensa.

Andecha Astur tamién informará nesta rueda prensa sobro les iniciatives que pon en marcha, énte l’alministración xudicial y énte l’Academia de la Llingua Asturiana, pa defender el drechu les asturianes y asturianos a emplegar la so propia llingua nel so país.