Inicio > Asturies > Represión a la Conseyera Cultura: d’aquellos vientos, estes turbonaes
AsturiesLlingua AsturianaPortada

Represión a la Conseyera Cultura: d’aquellos vientos, estes turbonaes

Andecha Astur recuerda a Berta Piñán qu’el PSOE ye’l responsable de la política de represión llingüística que güei careció ella na Xunta Xeneral

Lo que güei asocedió nel parllamentu asturianu ye inadmisible, propio d’un estáu colonizador que torga a los colonizaos utilizar el so idioma; pero ye lo mesmo que tolos asturianos carecemos a diariu, y ello gracias a la represión llingüística que siempres favoreció el PSOE.

Reclamamos, por supuestu, el drechu de Berta Piñán y de cualisquier otru asturianu/a a espresase na propia llingua, na Xunta y fuera d’ella, pero nun podemos escaecer que la represión de los asturfalantes foi fasta hai bien pocu parte del programa y de la política de los socialistes asturianos, que se vieron forciaos a camudar la so postura por mor de la presión ciudadana a favor de la Oficialidá. De magar entós socediéronse los xeitos ermos y les semeyes coles que, ensin comprometese’n firme nin camudar la realidá llingüística asturiana, pretenden convencemos de que son ellos los adalides de la llucha polos drechos llingüísticos.

El fechu ye que de magar l’aprebación del actual estatutu d’autonomía, impuestu dende Madrid y que mos relega a ciudadanos de tercera, quedó blindada n’Asturies la represión de la nuesa llingua. La posterior negativa a camudalu por parte de los socesivos gobiernos del PSOE, que nin siquiera desendolcó nin aplicó la yá de por si probe llei d’Usu y promoción del asturianu, afondó con fechos na discriminación de los asturianos.

Poro, consideramos que’l silenciamientu -rápidamente acatáu- de Berta Piñán nun ye sinón la consecuencia de la falta de drechos y llibertaes que los asturianos carecemos a diario y de continuo, que son consecuencia direuta de les polítiques aplicaes añu tres añu pol PSOE.

Cuandu Andecha Astur tuvo de recurrir a la xusticia pa presentase n’asturianu a les elleiciones, l’abusu cuandu s’anularon votos llegales por tar les papeletes na nuesa llingua o la indefensión carecida cuandu -va unos meses- se refugaron escritos a la xunta elleutoral por tar escritos n’asturianu, en toos esos casos, foi el gobiernu del PSOE quien fexo’l papel de represor. Les mesmes voces que güei s’alcen indignaes callaron entos, o inclusu aplaudieron.

Agora alcuéntrense na surrealista situación de represores reprimíos, careciendo en propia carne lo que los asturianos vivimos a diario: quien sema vientos recueye turbonaes.

2 thoughts on “Represión a la Conseyera Cultura: d’aquellos vientos, estes turbonaes

Deja un comentario

Tu dirección de correo electrónico no será publicada. Los campos obligatorios están marcados con *