Mentes siguen llegando turistes a Asturies, Barbón nun tien más alternativa que pretender que los asturianos faigamos de “Policía de balcón cazaturistes”
Estos díis son munchos los asturianos y los conceyos, especialmente costeros, que se quexen de que les viviendes de segunda residencia tán acoyendo, otra vuelta más, a los sos dueños foriatos.
Esta rialidá, custiones sanitaries al marxe, debía obligar a revisar la política territorial, cultural y turístico del “Principado”, que convirtió dalgunos conceyos d’Asturies en xalés braniegos pa un nueu turismu colonizaor, xenerando problemes nel caltenimientu la identidá cultural, dependencia económico, especulación urbanístico, encarecimientu la vivienda, empeoramientu de la calidá de vida de los asturianos d’esos conceyos, etc.
Pero, dende’l puntu vista sanitariu, agora prioritariu, ello amuesa que l’Estáu español nun cumple les sos fonciones; porque en manes d’ellos ta que los turistes nun abandones les sos ciudaes camín del paraísu ñatural que-yos vendieron.
Amuesa tamién la probitú de competencies que tien esti “Principado” que mos impunxeron: nun tien competencies sol movimientu la población y nun pue pesllar les fronteres asturianes en casu necesidá. El mesmu Barbón reconocía los sos míseros poderes cuandu, al entamu d’esta cris sanitario, afitó qu’él pesllaría Asturies pa tornar la pandemia, pero qu’España nun lu dexaba. Pero nun hai pelligru, Barbón llimitóse a facer de pigarra de la Dellegación del Gobiernu español, dando por bonu’l control qu’ésta lleva a cabu en tala materia.
Teniendo un gobiernu español que ye incapaz de contener la población nes sos ciudaes, y un “Principado” incompetente nestes materies, Andecha Astur creye que los Conceyos, l’alministración más averá al ciudadanu, tienen d’amosar coherencia y compromisu cola so vecindá, asumiendo con enfotu la misión de controlar la ocupación de viviendes de segunda residencia y desixendo al Estáu la intervención, control y sanción de ca casu concretu.
Ye llamentable qu’un presidente incompetente (nos dos sentíos del términu), comu Barbón, quiera tapecer la so falta poder rial llamando a la ciudadanía a exercer de lo que nesta cris se noma “policía de balcón”. Afalar a los vecinos a convertise en chivatos, pola incompetencia de los gobiernos FSA-PSOE y PSOE-Podemos, nun ye dalgo que vaiga fortalecer la calidá democrático de la nuesa convivencia.
Señor Barbón, nun pida chivatos. Salga al balcón de la cai Fruela a desixir valerosamente poderes riales pal so gobiernu, y ellí taremos con vusté los asturianos. Y, si nun ye capaz, por coherencia… dimita.
