Inicio > Asturies > Carta abierta a Adrián Barbón, artista del posturéu
AsturiesPortada

Carta abierta a Adrián Barbón, artista del posturéu

Llucía Fernández*

Adrián Barbón, nuna clas maxistral de posturéu, remana pa si la figura
de Belarmino Tomás y del Conseyu Soberanu, pero dexando a un llau los
valores que representa y tolo que seya Soberanía

Non, Adrián, tú nun yes l’heriederu de Belarmino Tomás. Qué más quinxeres. Asiellándote nel despachu d’un grande nun dexes de ser lo que yes: un vendíu a los intereses españoles, sumisu cumplidor de les voluntades d’un gobiernu corruptu, veníu a más gracies a los tos xuegos coles esperances de los asturianos.

Nun te creimos cuando prometiesti una oficialidá contraria a les directrices del to partíu y nun te creemos
agora, por muncho que saques semeyes. Tampocu la istitución que representes -esi enxendru impuestu col estatutu que los asturianos nun pudimos votar, el “Principado”- tien que ver col Conseyu Soberanu.

Esi despachu quédate grande. ¿Conoces siquiera el so significáu? ¿Qué sabes del presidente de la que foi la cabera istitución soberana llibremente escoyía polos asturianos? ¿Sabes siquiera qu’esi despachu foi tomáu como botín de guerra pol Exércitu español tres l’acupación d’Asturies nel añu 1937? ¿Y sabes que si te sientes nesa siella ye gracies a que dende Andecha Astur, 64 años después, lu reclamemos, que
lu tornemos a reclamar, añu tres añu, ante la total desidia del  “Principado” que tu agora representes?

Lo que si yes ye un artista, eso nun te lo voi negar: lleves el posturéu a un nivel superior, dexando atrás a unos profesionales del campu comu son Podemos. Impresionante la maxistral actuación utilizando la llingua comu cebu elleutoral, pero ensin afitar la Oficialidá, siguío del discursu «la Nueva Asturies», col que ficiste escaecer a munchos -non a nós- que yes un conocíu  home de Villa, con cargos políticos nel partíu
na dómina de mayor corrución y que si por daqué destacó la to xestión  foi pol grau de sumisión y servilismu a les polítiques emanaes dende Madrid.

Agora utilices la figura de Belarmino Tomás y del Conseyu Soberanu pa llimpiar la to imaxe  y la d’un  «Principado» impuestu dende Madrid, queriendo remanar tol simbolismu empreslláu nesos muebles, pero dexando a un llau los valores que representa y tolo que seya Soberanía.

Lo dicho, un artista.

 

*Llucía Fernández forma parte de la Xunta Executiva d’Andecha astur y foi cabezalera na candidatura nes pasaes elleiciones nacionales

Deja un comentario

Tu dirección de correo electrónico no será publicada. Los campos obligatorios están marcados con *