Inicio > Asturies > Esbarrumbu del horru de Vis
AsturiesCultura asturianaPortada

Esbarrumbu del horru de Vis

La Fiscalía reconoz la responsabilidá de Barbón y recurre al desconocimientu de los dueños pa esculpialu

Tres l’esbarrumbu en xunu de 2020 del Horru de Vis, mítica pieza del padremuñu asturianu asitiá n’Amieva, Andecha Astur denunciare énte la Fiscalía Superior la responsabilidá que nesti fechu tenía Barbón, la so Conseyera Cultura (Berta Piñán) y otros responsables de l’Alministración.

La Fiscalía vese obligá a reconocer que tola llexisllación na qu’Andecha Astur sofita la denuncia ye procedente pal casu y tien plena vixencia. Tamién almite que’l Gobiernu de Barbón sabía dende hai años del grave estáu de deterioru que carecía l’horru. Sicasí, la Fiscalía atrévese a centrar tola responsabilidá sólo nos propietarios del bien, esculpiándolos darréu porque supuestamene nun tendríen costancia de la inclusión del horru, en 2018, nel Inventariu de Padremuñu Cultural d’Asturies. Mentantu, al empar, reconoz qu’Andecha Astur tien razón cuandu señala que la llei diz que’l delitu escontra’l padremuñu pue cometese por aición destructiva escontra un bien cultural o por omisión de les aiciones necesaries pa caltenelu, y tamién que la llei obliga a l’Alministración a xixilar, controlar y executar sosidiariamente los llabores necesarios pa caltener el bien protexíu.

Por embargu, la Fiscalía vien de retrucar ordenando l’archivu les dilixencies d’investigación abiertes, nuna resolución apiná de contradiciones, toes elles dirixíes a protexer les culpes que con evidencia señala la llei na Alministración.

Andecha Astur señala que la esculpación de les responsabilidaes del Gobiernu asturianu sofitándose en que nun conocía los dueños del horru ye un motivu inesistente na llei. Y qu’acoyese a ello sólo se pue interpretar comu una maniobra cómpliz pa tapar les responsabilidaes de Barbón, Berta Piñán y otros responsables de l’Alministración en materia padremuñu.

N’Asturies la íntima rellación esistente ente la FSA-PSOE, el Gobiernu y la Fiscalía Superior tán permitiendo amparar llegalmente situaciones mui graves que n’otros territorios el Estáu nun son posibles. Poro, Andecha Astur señala qu’ún de los primeros intereses d’Asturies pa garantizar el so futuru ye frañer esa viciosa vinculación tripartita.

Per otru llau, no que cinca al futuru del Horru de Vis, la resolución de la Fiscalía reconoz que, lo mesmo enantes que dempués del esbarrumbu, la Casa Conceyu d’Amieva comunicare al Gobiernu la so incapacidá téunica y económica pa garantizar primero la pervivencia del horru y llueu la so recostrución.

La Fiscalía tamién reconoz motivos pa una seria allarma social y pa una intervención política urxente: dalgunos restos del Horru de Vis tán amontonaos nuna finca embaxo una llona, otros metíos nuna cuadra y otros entá tán albentestate nel llugar del esbarrumbu.

Con unos restos ensin suficiente proteición, con unos dueños qu’entá nun son conocíos na so totalidá y con una Casa Conceyu ensin recursos, ye inútil que la Conseyería requiera a la propiedá un proyeutu téunicu pa la recostrución del horru, comu fexo publicitariamente tres la so ruina, anunciando la pronta recostrución del horru. Barbón y Berta Piñán mienten. La única solución ye que’l Gobiernu d’Asturies asuma con valentía la so obligación d’actuar sosidiariamente pa garantizar la pervivencia, vía recostrución, d’un símbolu de la cultura asturiana que tenía llegalmente encomendáu a la so proteición.

Y eso ye lo qu’Andecha Astur demanda agora a Barbón y a Berta Piñán: la urxente recostrución d’oficiu del Horru de Vis, asina comu l’apertura inmediata de nueos calces d’aídes pal caltenimientu de los horros y paneres d’Asturies, comu padremuñu protexíu que son. Quedamos pendientes agora de que Barbón amuese, tamién nesta tema, la so capacidá pa ser bramente asturianu y firmemente cumplidor del marcu xurídicu vixente.

Deja un comentario

Tu dirección de correo electrónico no será publicada. Los campos obligatorios están marcados con *