Inicio > Asturies > Andecha Astur denuncia a la UXT énte la OLAF
AsturiesXunión Europea

Andecha Astur denuncia a la UXT énte la OLAF

Andecha Astur llevará énte la Oficina Europea Escontra’l Fraude (OLAF) la corrución de la UXT nos Cursos de Formación, al empar que pide la suspensión cautelar de cualisquier sovención a la UXT mentantu duren les investigaciones.

Los díis 8 y 9 d’avientu representantes d’Andecha Astur desplazaránse a Bruseles, onde acompangaos polos sos socios del grupu europarllamentariu “Agora Repúbliques” (EH Bildu, Esquerra de Catalunya), presentarán na la Oficina Europea escontra’l Fraude (OLAF) una denuncia escontra’l sindicatu UXT por presuntu usu fraudulentu de los fondos europeos de formación pal emplegu.

Andecha Astur pide a la OLAF qu’investigue esti presuntu delitu y que, pola so gravedá, suspenda cautelarmente cualisquier sovención al sindicatu español UXT.

Por esti mesmu motivu’l Xulgáu nº 4 d’Uviéu abrió dilixencies a la UXT, dempués de qu’en 2015 la UCO de la Guardia Civil, detuviere al secretariu xeneral, Justo Rodríguez Braga, y a otros 5 representantes, amás de rexistrar el llar sindical.

Ente la gravedá de los fechos, la Xunta Xeneral d’Asturies viose obligá en 2017 a abrir una Comisión d’Investigación qu’ellaboró una “Propuesta de dictame”, que la mayoría de la Xunta (PSOE, PP, IU, Ciudadanos) prefirió nun convertir en documentu oficial, porque estos partíos españoles que viven del sistema tienen la sospechosa costume de comportase comu un “sindicatu del crime”, tapándose los delitos unos a otros.

Sicasí, esa propuesta de dictame afita la esistencia de “indicios ñidios d’un posible desvíu de fondos destinaos a la formación pal emplegu” y acusa a la UXT de tener n’Asturies un entramáu d’empreses pantalla y fondaciones que-y permitieron elevar la faturación y evitar los controles, prevocando un gran quebrantu a les arques públiques. Esti informe denuncia la esistencia de práutiques fraudulentes y desvíu sistemáticu de fondos, apropiándose illegalmente de les sovenciones europees recibíes pa formación pal emplegu. La UCO  de la Guardia Civil estimó’l fraude en 1’35 millones d’euros ente los años 2010 y 2014. Pela so parte la Intervención Xeneral de l’Alministración del Estáu (IGAE) notificó al xulgáu que la UXT apropióse de más de 1’4 los millones d’euros y anuncia que la cifra final del fraude pue ser entá muncho mayor.

L’informe que los partíos españoles se ñegaron a aprebar na Xunta Xenral señalaba les responsabilidaes polítiques de tres espresidentes (Javier Fernández, Álvarez Cascos y Álvarez Areces). El segundu d’ellos acusáu agora tamién de cobros indebíos nel so partíu. Y el terceru, tres la sentencia condenatoria del casu Riopedre, recibió reconocimientos honoríficos del Conceyu Xixón y del Gobiernu d’Asturies, pa tapar meyor entá les sos responsabilidaes polítiques na corrución sistémica que los partíos españoles llantaron n’Asturies.

 

Deja un comentario

Tu dirección de correo electrónico no será publicada. Los campos obligatorios están marcados con *