Ente l’episodiu la banderona, Andecha Astur llama a rechazar la imposición identitario y a reforciar les rempuestes asturianes ente un españolismu patolóxicu (antiasturianu y antidemocráticu)
La vida ciudadana n’Uviéu vese alteriá por una intervención política innecesaria nel centru d’Uviéu. El motivu supuestu de les obres qu’afeuten a La Escandalera ye meyorar l’acesibilidá y permitir una salía non pelligrosa del parking. Sicasí, éstes son sólo dos escuses “políticamente correches” pa tapecer el braeru motivu de la intervención, que ye difícilmente xustificable: llantar una banderona española de proporciones descomanaes nel centru la ciudá.
El llogru l’acesibilidá y la seguranza na salía’l parking nun tienen feches de consecución, pero sí la banderona, pa la que’l Conceyu ta recurriendo a contratos menores urxentes con tal de qu’esnale nel aire nel aniversariu de la costitución española, la mesma cola que s’aseguró la tresformación del réxime franquista nun nueu réxime igualmente lleal al sistema: la monarquía parllamentaria del 78, escoyía por Franco y heredera del dictaor. Too pa vindicar grandonamente la pretendía españolidá d’Asturies.
La istalación del poste, el trapu la bandera, la colocación d’una nuea cámara de xixilancia, l’acondicionamientu’l llugar y el caltenimientu necesariu va representar un gastu d’unos 60.000 euros. L’equivalente n’Uviéu a 600 beques escolares o a 50.000 billetes d’autobús. La banderona, la Fundación de la princesa española, los premios que dan, los gastos publicitarios, la merca de voluntaes… Vese que se necesita fundir munchu dineru pa tapecer qu’Asturies ye la primer nación hestórica de la península. Y necesítase un altu nivel de represión político ya identitario pa ñegamos el drechu a decidir (perriba d’un Estatutu d’Autonomía impuestu) y el drechu a usar llibremente la nuesa llingua.
La plantación colonial d’una banderona española de proporciones megalítiques preba que la drecha que gobierna’l Conceyu d’Uviéu (PP, Ciudadanos y Vox) ta afeutá pol síndrome de Napoleón, na versión identitaria d’esta patoloxía. Defínense comu españoles, pero noten que la so identidá ocupa un espaciu irrelevante n’Asturies, un país nel que los estudios sociolóxicos siempres amosaron el predominiu de los que se sienten sólo asturianos o más asturianos que ná. Siéntense pequeños y, colos piores métodos (urxencia másima, falta d’alderique social previu, gastu desproporcionáu en dalgo innecesario, proteición policial del entornu…), ponen en marcha un actu qu’entienden compensatoriu del so déficit: van tener la bandera más grande que naide.
Esmolezmos la necesidá que la drecha española tien de compensar el so valir rial n’Asturies. Denunciamos los sos métodos, que por impositivos resulten antidemocráticos. Señalamos la so actitú irracional de mostrase escontra la identidá de los asturianos siempres que puen.
Alertamos a la ciudadanía de que la esistencia d’un síndrome de Napoleón na drecha española ye un seriu problema de salú político, porque los afeutaos por síndrome talu amuesen siempres conductes impositives coles qu’intenten compensar la curtia talla política.
Los cabezaleros españoles de Vox amosaron los primeros síntomes napoleónicos cuandu quinxeron tapar un cachu Xibraltar con un banderolu español. Agora’l PP y Ciudadanos vienen de prebar el so contaxu n’Uviéu. Pa les asturianes y asturianos ye una custión de salú política pública evitar qu’esta drecha española desenrrolle más síntomes de megalomanía antiasturiana y antidemocrática.
El PSOE y los sos socios de Podemos nun lo van facer: son partíos d’ámbetu estatal; el PSOE gobernó Asturies cuasi 40 años prohibiendo l’asturianu y Podemos sofitólos ensin escrúpulos cuandu foi necesario. Poro, Andecha Astur llama a amosar un rechazu popular a esti actu d’imposición identitario y a reforciar colleutivamente les rempuestes asturianes ente esti españolismu patolóxicu.
