Vox pide illegalizar a Andecha Astur porque sabe que ye la única organización asturiana que llucha por un futuru dignu p’Asturies, ensin sucursalismos, servilismos nin sumisión.
Qu’una organización facista tea llegalizada ye una de les anormalidades de la “democracia española” resultante del réxime del 78, pero qu’esa organización s’atreva a pidir la illegalización d’un partíu políticu democráticu, espeya nidiamente’l procesu d’involución democrático pol que ta pasando’l Reinu d’España.
Saben perfechamente que somos los únicos que mos ñegamos a aceutar el futuru de miseria y esaniciu que tienen diseñao p’Asturies dende Madrid cola complicidá del “Principado”, y saben qu’enxamás nun vamos dexar de lluchar por un futuru dignu p’Asturies.
Por eso Vox apunta p’Andecha Astur, porque persabe que somos la única alternativa de futuru p’Asturies, dende la izquierda y la soberanía, que nun respondemos más qu’a los intereses del Pueblu Asturianu, que nin somos nin sedremos una sucursal de naide, y que nun sabemos de servilismos y sumisión. Por eso tamién hai tantos silencios énte esti intentu de criminalizamos, de criminalizar les nueses idegues, porque nun ye solo a Vox a los que-yos preocupamos,tamién preocupamos a tolos que son cómplices, súbditos, sucursales del Reinu d’España n’Asturies.
Andecha Astur denuncia esti intentu de criminalización, denuncia los silencios cómplices y perafítase nel so compromisu de lluchar por un futuru dignu p’Asturies, una Asturies na que se respeten los drechos individuales y colleutivos, onde se garantice’l nuesu drechu a decidir y a trabayar y vivir dignamente.
One thought on “Ye Vox quien debiere tar illegalizáu”