Inicio > Asturies > Llamamientu a manifestase escontra la monarquía española
AsturiesPortada

Llamamientu a manifestase escontra la monarquía española

Andecha Astur llama a participar na concentración escontra la monarquía española que tendrá llugar esti vienres n’Uviéu nel marcu los premios principiegos

Andecha Astur nun reconoz a la monarquía española nin al «Principado», impuestu a Asturies nos tiempos d’Alfonso Enriquez comu castigu a los nuesos deseyos d’independencia. Nun reconocemos l’autoridá del reinu d’España sobre los asturianos nin sobre’l nuesu territoriu

Enxamás comu agora, cuando l’españolismu  ta ensiñando la so cara más violenta y represora, en plena espresión del capitalismu más xabaz y de falta de llibertaes individuales y colleutives, foi tan preciso dar una rempuesta na cai a la vergoñosa esibición d’españolismu colonialista que tien a los monarques d’España comu protagonistes.

Camentamos que, con esta farsa de premios, de fondu raigañu franquista, la monarquía española trata d’autollexitimase remanando pa si -nuevamente- un espaciu que correspuende al Pueblu Asturianu, faciendo por tapecer les llaceries propies de la so istitución, más propia de la Edá Media que del sieglu XXI. Too ello de la man del folclorismu más ranciu, la manipulación informativa más desvergoñada y una descomanada inversión económica, que recae sobre un pueblu autoproclamáu republicanu.
Estos premios faen también por mazcaritar con imaxen de progresu y referente cultural a una Asturies sumida nuna descomanada crisis social y económica, de la que España y la so corona española son responsables en bona midía.

Dende Andecha queremos sorrayar de la importancia de que tola izquierda soberanista participe nesta concentración y se de una rempuesta clara a esta nueva humildación del Pueblu Asturianu.

Ello asina, facemos un llamamientu al conxuntu del Pueblu Trabayaor Asturianau a participar na concentración convocada pal prósimu vienres 18 d’ochobre a les 17 hores na Plaza la Escandalera d’Uviéu.

¡Asturies nun tien rei!!!

Deja un comentario

Tu dirección de correo electrónico no será publicada. Los campos obligatorios están marcados con *