La escenificación del non-alcuerdu pa la oficialidá, un capítulu más na dinámica de posturéu y falta de compromisu
A la fin, búscase un escenariu nel que la oficialidá pueda ser remanada como recursu elleutoral, y nel pior de los casos –si la presión social los obliga- a transixir por una oficialidá de mínimos, abierta a la galleguización d’Asturies, y ensin reconocencia de drechos plenos pa los sos falantes.
La falta d’alcuerdu ente PSOE, IU, Podemos y Foro pa incluyir la oficialidá de la llingua asturiana nuna prósima reforma del Estatutu d’Autonomía, supón un capítulu más na dinámica de posturéu y falta de compromisu d’unos partíos políticos que vienen escenificando un auténticu bodevill con declaraciones y xestos valeros de conteníos y que retrasaron coscientemente’l momentu de ponese a negociar, pa facer inviable la execución d’un posible alcuerdu.
Ello asina, la esistencia d’unos ‘desalcuerdos insalvables’ en materia fiscal nun son más qu’una esculpia que favorez a toles partes, y que contamina la reconocencia de la oficialidá de la llingua asturiana, situándola nel campu la política y non como lo que ye: un drechu humanu incuestionable.
A la fin, l’escenariu que busquen toos ellos, ye’l de la supuesta inviabilidá de la oficialidá, porque nel fondu nun-yos interesa lo más mínimo reconocer al pueblu asturianu una seña d’identidá tan importante, y porque ven la oficialidá –toos ellos- como un recursu políticu que pue ser remanáu con vistes elleutorales.
Agora mesmo, dempués de retrasar fasta’l postrer momentu la posibilidá de tramitar la oficialidá nesta llexislatura, ensin qu’ensiquier esista un documentu base alrodiu del que negociar, y col alderique contamináu por temes ayenos –la fiscalidá-; preséntase-y a la sociedá asturiana una situación final na que los responsables culpabilícense ente sigo, y xustifiquen la continuación de la situación orixinada nos ochenta cola imposición dende Madrid del “Estatuto de Autonomía para el Principado de Asturias”, ensin drechos, llibertaes, y por supuestu ensin oficialidá.
Ye más, nel posible casu de que la presión de la sociedá asturiana los obligara a ponese d’alcuerdu, l’escenariu creáu va permiti-yos que se dea por bona una oficialidá de mínimos dafechu, ensin reconocencia de drechos plenos pa los falantes y por supuestu, que permita esgayar del troncu del asturianu a les fales del ocidente, como pasu previu a la so definitiva galleguización.
Ello asina, dende Andecha Astur pedimos a la sociedá asturiana que nun entre nel xuegu d’aceutar esti escenariu ‘finalista’, que nun entre n’alderiques falsos como ye’l de la fiscalidá, nin negocie con un drechu humanu tan básicu como ye la oficialidá de la nuesa llingua, y qu’asuma la reivindicación sistemática y costante de los sos drechos presonales y colleutivos. Nun vamos aceutar denguna oficialidá que nun seya plena.
Como reflexón final, Andecha Astur atalanta qu’esta situación dexa bien nidio que’l futuru d’Asturies y del pueblu asturianu pasa por qu’esti tea representáu por formaciones polítiques asturianes y non por sucursales madrilanes -seyan del signu que seyan- n’isituciones asturianes soberanes con capacidá pa decidir llibre y democráticamente.
