Inicio > Sin categoría > Intervención de Llucía Fernández nel Homenaxe a la Declaración de Soberanía del 25 Mayu de 1808
Sin categoría

Intervención de Llucía Fernández nel Homenaxe a la Declaración de Soberanía del 25 Mayu de 1808

Vivimos unes circustancies perestremaes de tolo conocío, que precisen de gobernantes fuertes y decidios que, coles coses mui clares, curien del bientar de la población asturiana ensin descuriar dala estaya nin ámbetu. Sicasí, el gobiernu d’Asturies reconozse incompetente ensin ambaxes, frases de la triba “si pudiere” “si tuviere competencies” “si por mi fuere” repítense na xestión de la crisis santiaria d’Adrián Barbón, fiel siguidor de la cúpula madrilana. A nivel estatal, España aprofita les pocu avezaes circustancies que vivimos pa imponer el so militarismu nes nueses cais, afitando, reforciando y ampliando’l so poder centraliegu.

Direis vosotros, que tien esto que ver col 25 de Mayu y la declaración de la Xunta Soberana? Muncho.

Con soberanía, les coses sedríen d’otra miente. Con soberanía, Asturies nun taría entrando, meyor dicho, afondando, nuna cris que menacia con ser etenra.

Con soberanía, nun tariemos falando de pidir permisos o de rogar el pagu d’aides miserables que nunca lleguen a tiempo; tariemos falando de comu xestionamos de manera que nadie nun quedare fuera, tariemos falando de soberanía alimentaria, d’encontos pa tolos seutores productivos, de comu entamar una educación igualitaria de calidá, on line si fae falta, pero igualitaria, de reforciar la sanidá pa que nun mos pille otra vegada despreveníos.

Eso, si tuviéremos soberanía, si los asturianos daveres decidiéremos que pasa n’Asturies.

Poro, ye importante agora mirar al nuesu pasáu y remembrar quién fuimos, camentar en quién somos, y decidir quién queremos ser. Qué futuru queremos pa la nuesa República Asturiana.

Nesi sen, nun podemos dicir más de lo que va 212 años dixeron ya otros pente estes mesmes muries que tenemos delantre

“El poder, tol poder, reside y procede del Pueblu”

Con eses pallabres, prenunciaes nel xuramentu del so cargu na autoproclamada Xunta Suprema Soberana, roblaben los sos miembros un compromisu col qu’Asturies asumía tolos atributos d’un estáu soberanu: bandera, exércitu, ministerios y embaxadores. Darréu, declararon la guerra a Napoleón Bonaparte, unviando a Llondres una embaxada pa pidir sofitu militar.

Esta declaración, la primera d’autodetermín del pueblu asturianu na historia moderna, tien llugar como consecuencia de la movilización y presión d’unes clases populares que tomaren la pallabra como actores políticos n’arena pública, siendo asina demientres esi periodu la institución política cimera d’esti país, ensin denguna interferencia d’instituciones foriates. De magar el 25 de Mayu y demientres cerca d’un añu, Asturies foi una estatalidá soberana dafechu y articuló unes estructures polítiques y militares al marxe de cualesquier marcu español

Cuando al otru añu una intervención militar punxo fin a la Xunta Soberana, la llinia argumental de Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero nun consiguió con ello caltener la nuesa soberanía, que foi disuelta, comu tantes otres vegaes na nuesa historia, pola fuercia bruta y la superioridá militar.

Esti añu, más de dos sieglos dempués, l’escaezu institucional torna a protagonizar esta fecha, ún de los intres más desconocios y al tiempu más motivadores de la Hestoria d’Asturies, non sólo polos fechos en sí, sinón polo que representaron y polo muncho que mos cuenten del sentimientu identitariu y defensor de la llibertá de los asturianos a lo llargo la hestoria.

Y si anguañu, esi 25 de mayu de 1808 ta escaecíu pol Pueblu Asturianu ye gracies a la manipulación hestórica y l’esborriamientu identitariu fechu demientres sieglos pol sucursalismu españolista. Nun ye un escaecimientu casual, esti fechu fálamos d’un pueblu, l’asturianu, qu’arguyosu de sí mesmu y naguando pola llibertá escoyó’l camín de la soberanía y l’autoorganización.

Eso ye lo que quieren qu’escaezamos. Eso ye lo que nun escaeceremos.

Llucía Fernández Marqués
Uviéu, 23 de Mayu de 2020

VER ACTU D’HOMENAXE

Deja una respuesta

Tu dirección de correo electrónico no será publicada. Los campos obligatorios están marcados con *