Llucía Fernández recoyía na so intervención política estes pallabres, prenunciaes nel xuramentu de los miembros de la Xunta Suprema na Declaración de Soberanía de 1808
L’actu d’homenaxe a la Declaración de Soberanía del 25 mayu de 1808 rializáu cola xida del XXIII Díi d’Andecha, cuntó coles llimitaciones en participación y coles midíes de seguranza desixíes na fase de desesguilada del andanciu del coranovirus, y nelli reivindicóse la importancia d’esta declaración hestórica, que como remembró Llucía Fernández na so intervención política, tuvo llugar «como consecuencia de la movilización y presión de les capes populares (…) De magar el 25 Mayu y demientres cerca d’un añu, Asturies foi una estatalidá soberaa dafechu y articuló unes estructures polítiques y militares al marxe de cualisquier marcu español». Asina mesmo, tamién denunció l’escaezu istitucional d’estos fechos «gracies a la manipulación hestórica y l’esborriamientu identitariu fechu demientres sieglos pol sucursalismu españolista»
Pero sobro too, la intervención política foi una reivindicación política de Soberanía pa l’Asturies d’anguañu, especialmente en situaciones como les que carecemos col andanciu del coranovirus onde «el gobiernu d’Asturies reconozse incompetente ensin ambaxes, frases de la triba “si pudiere” “si tuviere competencies” “si por mi fuere” repítense na xestión de la cris sanitaria d’Adrián Barbón, fiel siguidor de la cúpula madrilana», afirmando que «Con soberanía, nun tariemos falando de pidir permisos o de rogar el pagu d’aides miserables que nunca lleguen a tiempo; tariemos falando de comu xestionanos de manera que nadie nun quedare fuera»
L’actu finó faciendo un llamamientu pa «mirar al nuesu pasáu y remembrar quién fuimos, camentar en quién somos, y decidir quién queremos ser. Qué futuru queremos pa la nuesa República Asturiana», y perafitándomos na voluntó de siguir l’exemplu d’esi pueblu asturianu «qu’arguyosu de si mesmu y naguando pola llibertá escoyó’l camín de la soberanía y l’autoorganización», mentes sonaba la Flos del Agua a la gaita y se facía la ofrenda floral.
One thought on “XXIII Díi d’Andecha: El poder, tol poder, reside y procede del Pueblu”