Inicio > Asturies > Actuaciones d’Andecha Astur escontra la financiación pública de los “Premios Princesa”
AsturiesPortada

Actuaciones d’Andecha Astur escontra la financiación pública de los “Premios Princesa”

Presenta una batería d’iniciatives nel Congresu, la Xunta Xeneral y principales conceyos asturianos pidiendo que dexen de financiar con dineru públicu a esta Fundación propagandística de la corona española

Güei la monarquía española y los sos principales vasallos escuéndense nel Hotel Reconquista pa escenificar un actu más de blanquiamientu d’esti réxime español corrutu y esplotaor. Comu Asturies siempres da rempuesta a esti tipu prevocaciones españoles, esta tardi (a les 19 h.) Andecha Astur y otres organizaciones antimonárquiques faen un manifestamientu peles cais d’Uviéu, que finará na Plaza La Escandalera.

Pero Andecha Astur ye la única organización política asturiana que lleva’l so compromisu con Asturies, cola so clas trabayaora y cola República Asturiana más allá, reforciando la rempuesta a comuña que representa’l manifestamientu con una batería d’iniciatives polítiques que presentó en Congresu español, Xunta Xeneral y Cases Conceyu d’Uviéu, Xixón y Avilés.

El diputáu Oskar Matute, de la coalición “Agora Repúbliques” (EH Bildu, Esquerra Republicana, BNG, Andecha Astur y otros grupos nacionaliegos) acaba d’entrugar al Gobiernu español de PSOE-Podemos por qué, si bixordea de progresista, nos caberos seyes años se sovencionó a la Fundación Princesa con 1.800.000 € (300.000 €/añu). Tamién entrugó fasta qué exerciciu fiscal PSOE-Podemos van siguir regalando eses sovenciones a la Fundación y si nun tienen plan d’invertir tales cantidaes nes necesidaes sociales urxentes que tien el pueblu trabayaor asturianu en materia de sanidá, educación, vivienda o política llaboral.

Tamién Andecha Astur acaba pidir a tolos grupos parllamentarios asturianos qu’apreben una resolución pal acabu les sovenciones que la Xunta Xeneral y el Gobiernu d’Asturies dan añalmente a la Fundación Princesa.  Nel periodu 2014-2019 el Gobiernu sovencionóla con 386.670 €. Pel so llau, la Xunta Xeneral regaló a esa Fundación la cantidá de 600.000 € nesi mesmu tiempu, tamién en forma sovenciones. El nacionalismu asturianu desixe a los grupos parllamentarios de la Xunta Xeneral qu’eses cantidaes se dediquen al fortalecimientu de los sirvicios públicos que, comu la sanidá o l’enseñu, tanta meyora necesiten n’Asturies.

La mesma iniciativa, de rescisión de sovenciones a la Fundación Princesa, presentóse a les Cases Conceyu d’Uviéu, Xixón y Avilés. Uviéu gastó neses sovenciones un total de 1.750.000 € nel periodu 2014-2019. Xixón regaló-yos 270.000 € nesi mesmu tiempu. Y Avilés marafundió 108.000 € nesos seyes años.

Andecha Astur señala la impudicia política que suponen estos fechos: un gobiernu español, un gobiernín vasallu d’un “principado”, una Xunta Xeneral escaecía de la so tradición heroica d’asturianía (1808) y unes Cases Conceyu entregaes a un sistema monárquicu, foriatu y corrutu, y que regalen presupuestos públicos arrampuñaos a la clas trabayaora asturiana per aciu los impuestos que deberíen dedicase a sirvicios públicos básicos. Más entá, cuandu les clases populares y trabayaores de toles naciones del Estáu yá se ven obligaes, al traviés de los Presupuestos Xenerales del Estáu, a pagar añalmente 7.887.150,00 € pa caltener la Familia Rial de los Borbón y la Casa del ciudadanu Felipe VI.

Andecha Astur denuncia tamién, con esta batería d’iniciatives polítiques, que la Fundación Princesa, llamentablemente allugá n’Asturies, nun ye más qu’el preséu de la corona española pal desendolcu la so política de propaganda. Y que’l so Patronatu ta integráu por representantes de grandes corporaciones bancaries y empresariales, comu Arcelor Mittal, BBVA, Bancu Sabadell, Corporación Masaveu, Abengoa, Liberbank, Hidrollétrica’l Cantábricu, Alsa, Bancu Santander, Corporación VIPS-Sigla, asina comu por miembros de la ñobleza española, todos ellos presonaxes ya entidaes ñidiamente enfrentaos a los intereses del pueblu trabayaor asturianu.

Pa finar, Andecha Astur fae un llamáu a la participación nel manifestamientu qu’esta tardi sal n’Uviéu a les 19 h. de la Cai Emilio Alarcos (Escaleres del Milán) y fina na Plaza La Escandalera.

One thought on “Actuaciones d’Andecha Astur escontra la financiación pública de los “Premios Princesa”

Deja un comentario

Tu dirección de correo electrónico no será publicada. Los campos obligatorios están marcados con *