Tres la sentencia en firme por un delitu de lesiones a un vecín, nun paez ético garrase al sillón de l’alcaldía y ñegar el drechu del Conceyu Sieru a tener un alcalde respetuosu, pacíficu y democráticu.
Tres la sentencia en firme que conderga con sentencia en firme a Ángel García, alcalde de Sieru, por un delitu leve de lesiones a un vecín, Andecha Astur considera que, arriendes de pidir esculpies a tolos vecinos del conceyu, Ángel García debiere asumir les consecuencies polítiques y étiques de los sos actos y presentar la renuncia al cargu d’alcalde y al de conceyal de la Casa Conceyu de Sieru.
Ángel García, acaba ser condergáu, con sentencia en firme, por un delitu leve de lesiones a un vecín, teniendo amás d’indenizar a la víctima con 219 € por mancaúres y encariar una pena de 45 díes de multa, a razón de 6 € diarios.
La sentencia afita comu fechos prebaos que’l 25 d’abril de 2020, al rodiu les 11’50 hores, na subidoria d’un portal, l’alcalde echóse enriba un vecín, garrándolu pel pescuezu y apertándolu escontra la paré. Apaecen tamién comu fechos prebaos que l’alcalde dirixóse al vecín diciéndo-y “voi matate, voi arrincate la tiesta, fíu puta”.
Como consecuencia de l’agresión, el vecín recibió asistencia mélica y entardó 7 díes en curar.
Tres el recursu presentáu pol alcalde, agora la xueza afita que tien credibilidá la denuncia presentá pol vecín, porque sofítase nun parte lesiones, nun informe forense y en semeyes que preben la esistencia de mancaúres nel pescuezu.
Pa dengún conceyu d’Asturies ye de gustu tener un alcalde condergáu, y menos por agresiones a un vecín, y nun paez ético qu’agora Ángel García quiera garrase al sillón de l’alcaldía y ñegar el drechu del Conceyu Sieru a tener un alcalde respetuosu, pacíficu y democráticu.
Poro, Andecha Astur pid que l’alcalde Sieru, Ángel García, asuma les consecuencies polítiques y étiques de ser condergáu con sentencia en firme por agresión a un vecín, y que presente la so renuncia al cargu d’alcalde y al de conceyal de la Casa Conceyu de Sieru.
