N’Asturies, el bloque drecha/facismu consigue 64.286 votos más que’n 2019 y gana otru diputáu; presentándose’l PP comu’l partíu más votáu y col mayor númberu d’escaños (3 de 7).
Frente a ello, hai que siguir avanzando nel aniciu d’un frente común asturianu y d’esquierdes.
Massimo D’Alema, cabezaleru’l Partíu Comunista d’Italia no cabero’l sieglu XX, dicía’n 2018, falando del so Estáu: “Cuandu la esquierda fae política de drecha pierde votos y llexitima a la drecha”.
Ye’l meyor resume de lo que representaron estos cuatru años del “gobiernu más progresista” de los Borbones (PSOE, Podemos, IU) y la convocatoria precipitá d’elleiciones españoles del 23 de xunetu.
La estafa de vender política socialdemócrata y neolliberal col etiquetáu de “progesismu” y “asaltu a los cielos” tuvo consecuencies: desmovilización de munchos votantes d’esquierdes y el determín d’otros votantes de sofitar al bloque del PP, porque si de facer polítiques de dreches se trata… Asina, la política del PSOE-Podemos-IU valió pa que, a nivel d’Estáu, el bloque drecha/facismu algame cuasi dos millones y mediu más de votos y consiga 28 escaños más; convirtiéndose’l PP nel partíu más votáu y con más escaños.
Hai que destacar lo especial d’estes elleiciones, pa les que’l propiu sistema aperió con urxencia estratéxica la operación Sumar: la creación esprés d’una marca nuea, con “llideresa” nuea, ensin procesos sociales participativos, ensin asamblees, ensin votaciones abiertes pa escoyer los sos candidatos, con numberosos recursos económicos pa encariar la campaña elleutoral…
¿Y pa qué valió’l procesu de fagocitar los restos de Podemos, reinventar una nuea marca comu si la política fore un mercáu votos y tornar presentase comu la marca blanca del PSOE, o la so muleta? Valió pa que, de los 35 escaños que tuvieron Podemos-IU, la “llideresa” de Sumar consiga menos votos y tenga de conformase con un grupu parllamentariu de 31 diputaos/es.
Eso nel ámbetu l’Estáu. A nivel d’Asturies el bloque drecha/facismu consigue 64.286 votos más que’n 2019 y gana otru diputáu; presentándose’l PP comu’l partíu más votáu y col mayor númberu d’escaños (3 de 7).
Ye un principiu políticu conocíu y esperimentáu. Les organizaciones d’esquierdes que, dende una posición de gobiernu, desendolquen polítiques propies de la drecha, acaben facilitando’l pasu al poder de la propia drecha. Cola gravedá añadía, nesti contestu, de que comu la drecha sola nun pue, ésta llega col sofitu del facismu español.
El panorama ye esmoleceor, por supuesto. Nun ye tiempu pa plasmar, pa llamentase, pa dir de crédulu, pa desactivase… Porque la fola facismu que s’esparde per Europa ta a les puertes de la Moncloa. Nun entrará d’ésta, pero acampa nos xardinos de la cai Xénova. Bien lo sabe Barbón, que, responsable igualmente de polítiques neolliberales, consigue la nuea presidencia al llímite de los votos.
Persabemos que sólo hai un camín pa siguir avanzando. Nun pasa por fabricar más muletes p’agabitar el pasu neolliberal del PSOE, nin por seguir con una dinámica sucursalista que ñega la nuesa identidá y drechos nacionales. Llevamos tiempu divulgando y trabayando por una nuea ruta.
Los resultaos que nestes elleiciones algamó EH Bildu n’Euskal Herria, compañeros na coallición Agora Repúbliques, amuesen que ye posible y positivo caminar nesa direición.
La propuesta desixe llabor a esgaya, pero la so presentación demanda pocu esfuerciu pedagóxicu: Per un llau, llabor antifacista fechu a comuña nes cais, nos barrios, nes asociaciones… Per otru, nel ámbetu políticu, trabayu noble pa conformar un frente común asturianu y d’esquierdes. Esi frente que llevamos proponiendo hai tiempu y pol que siguiremos andechando pa facelu rialidá. Un proyeutu popular que nun seya sucursal de Madrid, ayenu a la casta. Un alcuerdu alrodiu d’un programa mínimu de defensa d’Asturies comu pueblu y de los asturianos/es comu clas trabayaora.
