Andecha Astur convoca pal sábadu 30 d’avientu, – a les 13:00 h. nel Cimenteriu Deva, Xixón- el tradicional actu d’homenaxe a Andrés Solar, vindicando la so trescendencia política y humana
Como vien faciendo dende va años, Andecha Astur convoca esti actu d’homenaxe al reconocíu escritor Andrés Solar, vindicando la so faceta política y humana.
Andrés Solar foi miembru fundaor del Ensame Nacionalista Astur, en cuyu programa políticu participó activamente, presentándose por esi partíu como candidatu a la Xunta Xeneral.
Arriendes d’ello, Andrés Solar foi en tou momentu un referente pola so implicación, capacidá de trabayu y cualidaes presonales, compañeru de militancia de munchos collacios d’Andecha Astur, y una referencia obligada pal conxuntu del nacionalismu asturianu.
Son precisamente eses facetes suyes, como presona, y como nacionaliegu, les que reivindica Andecha Astur nel homenaxe que se cellebrará’l prósimu sábadu 30 d’avientu, a les 13 hores nel Cimenteriu Deva -Xixón-.
Un merecíu homenaxe al autor d’esa poesía que tan bien espeya’l sentir y los enfotos del nacionalismu asturianu:
“Prúyemos un pueblu llibre/ que nome cola so voz / los sos collacios y el pan. / Prúyemos un pueblu llibre / y una Asturies dixebrá.»
