Andecha Astur llama a participar nes movilizaciones escontra la entrada na cárcele de Les 6 de La Suiza
El Tribunal Supremu vien de presllar la cabera opción de les 6 de La Suiza pa nun entrar na cárcele, al negar el xuez Lino Rubio –a la escontra de la opinión del fiscal, que nun s’opón- la separtación de les dos condergues, yá que cauna per separtao nun suma la pena mínima pa entrar en prisión, o la suspensión de la conderga.
De magar agora puen dir a buscales pa entrar en Villabona, lliteralmente, en cualisquier momentu, namás por participar nuna campaña normal d’aición sindical, entamá pola CNT en defensa d’una trabayaora supuestamente acosá llaboral y sesualmente na antigua Pastelería La Suiza, de Xixón.
La execución d’esta conderga implica l’afitamientu del recorte de los drechos ciudadanos y sindicales que permite, dende 2015, la conocía comu Llei Mordaza, -aprebada pol PP pero caltenía y aplicada con gustu pol “gobiernu más progresista de la hestoria”- col sosiguiente endurecimientu’l Códigu Penal en materia drechos y llibertaes ciudadanes.
Asienta amás un precedente pelligrosísimu pa tola sociedá, al castigar con saña y desproporción la solidaridá obrera y los drechos sindicales, dos pegoyos ensin los que ye imposible la esistencia de cualisquier réxime que se pretenda democráticu.
Pero implica amás la connivencia d’un presidente, Adrián Barbón, y d’una Delegada de Gobiernu, Adriana Lastra, que tuvieron y tienen nes sos manes la solución y que desoyeron sistemáticamente’l clamor del Pueblu Asturianu que demientres cuasique diez años movilizóse nuna amuesa de solidaridá exemplar. Lo que s’espera d’ellos agora ye la non execución de la conderga, el so posicionamientu a favor del indultu o la reducción de pena/aplicación inmediata del tercer grau, maniobra que conocen perbien d’aplicala a compañeros del PSOE pa garantizar un rápidu pasu per prisión.
Por mor de too ello, Andecha Astur sofita la concentración que se va facer na Plaza Mayor de Xixón, el xueves 5 a les 19:00 h., pol drechu a la llibertá de Les 6 de La Suiza y pol drechu a la llibertá de tol Pueblu Asturianu, comprometiéndose a siguir collaborando xunitariamente colos colleutivos sociales y políticos que coinciden na defensa d’estes compañeres.
