Inicio > Sin categoría > Intervención política del Díi de la Nación Asturiana
Sin categoría

Intervención política del Díi de la Nación Asturiana

El discursu tuvo consensuáu polos convocantes -Andecha Astur, CSI (Corriente Sindical d’Izquierda), Mocedá Comunista, JCE m-l) y Famyr- y lleíu por Irene Orviz -Corriente Sindical d’Izquierda- y Llucía Fernández (Andecha Astur)

DÍI DE LA NACIÓN ASTURIANA ’22

Tamos equí porque tán convirtiendo Asturies nun país precariu y amás ñéguense a reconocemos el drechu a escoyer el nuesu futuru.
El 20% de la población que trabaya n’Asturies cobra menos del Salariu Mínimu Interprofesional.

Sofrimos una tasa xeneral de paru del 11’35 %, que ye del 11’75 % pa les muyeres y xube al 29’38% nel casu la mocedá.

El 90% de los nuesos conceyos perdió población no poco que va d’esti sieglu XXI.

Oblígasemos a denunciar de contino la desinversión y los recortes na sanidá público, mentantu se facilita la privatización de prestaciones y de l’atención sanitaria en xeneral.

Los mesmos recortes d’inversiones atopamos nel ámbetu la enseñancia, pero sólo na rede pública, a costa de la cual se sigue financiando la enseñancia privá concertá.

El capitalismu, col beneplácitu’l poder, crea nuees fórmules d’esplotación llaboral ca vegá más esclavistes, valga d’exemplu’l seutor de repartu mercancíes y productos.

El poder xudicial español, comu l’Audiencia Provincial que sufrimos, considérase tan poderosu ya inatacable comu pa castigar con tres años y mediu de cárcele a seis trabayaores por exercer los sos drechos sindicales.

El llabor d’apoyu social, que desendolca sobro too la muyer al traviés d’axencies d’aída a domiciliu, nin ye renoconocíu comu un sirviciu públicu nin ye retribuyíu comu ye mester.

L’Asturies ganaera, campesina y pesquera vese ca vegá más afogá por polítiques que los lobbys del seutor diseñen fora la nuesa tierra.
A munches de les nueses neñes y neños l’alministración ta allimentándolos nes escueles con sirvicios de catering que saben que nun tienen la calidá necesario nin son salubres.

El Gobiernu d’Adrián Barbón desdexa con descaru l’atención de los estremos d’Asturies, domináu pola megalomanía d’un Área Metropolitana Central, de gran interés pa los tres “cultivos intensos” que’l capital européu mos reserva: ocalitos, eólicos y
turismu.

El nuesu padremuñu cultural y llingüísticu sigue echándose a perder, ensin llexisllación proteutora valible, ensin inversiones, ensin amor pol país… Comu exemplu abasta’l circu qu’Adrián Barbón y otros partíos montaron al rodiu d’una oficialidá que yera segura, pero que nunca nun llegó polo muncho que la tarrecen.

Esta Xunta Xeneral foi la que quinxo distrayemos y amoriamos con un posible nueu Estatutu d’Autonomía que nunca nun ñació, pero que diba ser impuestu porque se mos ñegaba’l dechu a votalu y que mos convertía otra vuelta’n súbtitos d’una corona foriata y arcaica.

Y la memoria hestórica d’Asturies nin se recupera nin se quier recuperar; comu amuesa ehí tenemosl’incumplimientu descaráu de la Llei de Recuperanza de la Memoria Democrática d’Asturies.

Pero güei nun mos concentramos énte esta vergoñosa “Junta General del Principado” pa remembrar esa Asturies con cara prieta que se mos impón dende’l poder istitucional, dende’l Gobiernu d’Adrián Barbón y el Gobiernu madrilanu.

Esta mañana concentrémosmos pa revitalizar l’Asturies roxa, l’Asturies verdi, l’Asturies violeta, l’Asturies multicollor que ye posible y que queremos pal futuru inmediatu.

Pa revitalizar esa Asturies y pa comprometemos con ella una vegá más y entá con más puxu.

Tamos equí porque tu pues comprometete y mover a los tuyos pa lluchar xuntos por otra Asturies, porque esa nación roxa, verdi, violeta, multicollor pola que naguamos ye posible.

Ye posible si cuandu mos llevantamos ca díi reservamos una migayina d’esa nuea xorná al compromisu social, sindical y políticu organizáu.
Otra Asturies ye posible si ca vegá que chocamos de focicu col discursu oficial del sistema, dedicamos un tiempu a comentar cola xente qu’hai alternatives y que, precisamente por eso, otru hai futuru.

Otra Asturies ye posible si ca vegá que conocemos una nuea mala noticia pal país asturianu y pa la so clas trabayaora nun mos dicimos a nós memos que llevamos milenta años derrotaos, y qué más da.

Porque ye mentira, porque llevamos milenta años lluchando, pero’l poder capitalista, la monarquía corruta y l’estáu impuestu entá nun ganaron la batalla definitiva.

Otra Asturies ye posible si ca vegá que van decidir nel nuesu nome dicimos que non, que comu presones llibres queremos decidir nós y que comu Pueblu llibre tamién queremos escoyer el futuru d’Asturies.

Otra Asturies ye posible si reacionamos desixendo soluciones cuandu’l problema nun ye nuesu, pero sí del compañeru o de la vecina. Porque la práutica de la solidaridá entre trabayaores non sólo ye tradicional ente nós, sinón que ta demostrao que ye’l camín haza l’ésitu na llucha.

Otra Asturies ye posible si tolos díes somos quién a dar la cara pol nuesu drechu a un trabayu y unos ingresos dignos, polos nuesos drechos sindicales, polos drechos de los colleutivos precarizaos o marxinaos, pol usu oficial y normalizáu de la nuesa llingua, pola esistencia digna de los sectores productivos tradicionales d’Asturies, pola esistencia garantizá d’unos sirvicios públicos de calidá’n sanidá, enseñu y aída a domiciliu, pol acabu la represión sindical y política, pola llibertá de decidir el futuru d’Asturies…

Otra Asturies ye posible si denunciamos al alto la lleva ca pasu del facismu, ñegándomos a nun dar importancia a cualisquier detalle que permita’l so xorrecimientu.

Porque puxamos por una Asturies llibre no individual y no colleutivo, igualitaria y plena de drechos. Y porque creyemos que’l facismu tien de ser derrotáu y los sos cómplices castigaos, comu Adrián Barbón, culpable de regalar grupu parllamentariu al facismu nesta Xunta Xeneral.

Otra Asturies ye posible si mos ñegamos a aceutar de manera fata, pasiva y acomodaticia que güei Asturies tien un gobiernu que ye socialista y de progresu. Porque ye mentira.

Porque’l PSOE renunció al socialismu hai munchísimes décades, convirtiéndose nún de los peones favoritos de la corona española y del gran capital.

Porque’l PSOE tamién hai muncho que dexó de defender al movimientu obreru, al que prefirió someter nel peselbre en forma de grandes sindicatos españoles.

Porque la socialdemocracia española enxamás nun foi lliberaora de presones nin de pueblos. Tolo contrario, siempres se presentó comu cómpliz de tolos poderes fáuticos represores: estáu, corona, banca, exércitu, prensa, patronales, fuercies policiales…

Otra Asturies ye posible porque ye vezu’l país el nun doblar, el nun dase, el resistir…

Sicasí, cuandu l’enemigu presenta una fuercia descomaná, les asturianes y asturianos tenemos de reforciar les nueses tradiciones asamblearies que siempres empobinaron a la xuntanza, al llabor social compartíu, a la solidaridá pente’l pueblu, al consensu…

Otra Asturies ye posible si toes y toos nós salimos de casa, de lo individual, de l’acomodación pasiva, del desenfotu, de la delegación irresponsable de los nuesos poderes cívicos y políticos.

Otra Asturies ye posible si somos quién a poner en marcha un gran conceyu abiertu nel que’l Pueblu Trabayaor Asturianu se comprometa a defender una plataforma de mínimos que garantice’l nuesu futuru comu trabayaores, comu asturianos, comu xente y pueblu llibre y d’esquierdes.

Por eso quinximos compartir con vós esta mañana, compañeres y compañeros.

Pa que’n xuntanza veamos el camín que mos lleva al futuru que queremos.

Pa espresavos equí’l nuesu compromisu seriu pa caminar per esa sienda.

Y pa pidir a toa Asturies que dea un pasu alantre, que forme un conceyu fuerte al rodiu d’eses custiones mínimes que son de necesidá evidente pa ufrir a les nueses neñes y neños y a los compatriotes emigraos una Asturies roxa, y verdi, y violeta… y multicollor.

Compañeres, compañeros… Güei comprometémosmos toes y toos a asumir esti compromisu con Asturies.
¡Puxa Asturies!

One thought on “Intervención política del Díi de la Nación Asturiana

Deja un comentario

Tu dirección de correo electrónico no será publicada. Los campos obligatorios están marcados con *