Trátase d’un modelu continuista, contaminante y contrariu a les direutives de la Xunión Europea
Andecha Astur vien de presentar alegaciones al Plan Estratéxicu de Residuos 2025–2030, denunciando que’l documentu promovíu pol Gobiernu del “Principado” supón la perpetuación d’un modelu fracasáu basáu na incineración y nel vertíu, y contrariu a les direutives de la Xunión Europea y a les demandes ciudadanes.
- Falta de participación y de evaluación real
El plan vulnera’l Conveniu d’Aarhus al entamar un procesu ensin participación ciudadana efeutiva, con plazos curtios y documentación difícil d’acceder. Amás, la evaluación ambiental estratéxica nun cumple cola normativa europea, lo que invalida’l plan como ferramienta de planificación. - Prevención inexistente
La prevención nun ye prioridá. El plan incumple la xerarquía de residuos establecida pola XE (prevención, reutilización, reciclaxe…) y dexa fora midíes concretes escontra’l despilfarru alimentariu, el plásticu d’un solu usu y la reducción xeneral de residuos. - COGERSA: un modelu agotáu
El plan calca’l modelu de COGERSA, basáu nel vertederu y na incineración, con instalaciones sobrodimensionaes y falses soluciones como’l CSR (Combustible Sólidu Recuperáu), que nun ye más qu’una escusa pa quemar residuos. - Alternatives reales: reciclaxe, compostaxe y economía circular
Andecha Astur propón:-
Recoyía separtada de materia orgánica con un oxetivu mínimu del 80%.
-
Aniciu d’una rede descentralizada de plantes de compostaxe.
-
Ampliación de puntos llimpios y sofitu a la reutilización.
-
Midíes fiscales que penalicen el vertíu y los envases d’un solu usu, y favorezan l’ecodiseñu y los materiales secundarios.
-
- Incineración y vertíu: una amenaza pal pueblu y’l mediu
La incineración xenera CO₂, dioxines y furanos, con graves impautos pa la salú. La Xunión Europea marca que pa 2035 namás el 10% de los residuos municipales puedan dir a vertederu, pero’l plan nun da un camín claru pa llogralo. La ciudadanía lleva años amosando oposición a esti modelu contaminante. - Emplegu verde frente a la quema de residuos
La reciclaxe y la reutilización xeneren fasta 10 vegaes más emplegos que la incineración. Asturies podría liderar un modelu d’economía circular que xenerara riqueza y protexera’l mediu, pero’l plan oficial escueye siguir srviendo a intereses empresariales.
Ello asina Andecha Astur esixe la revisión integral del Plan de Residuos 2025–2030, eliminando la incineración como opción central, reforzando la prevención y la reutilización, y afitando un modelu d’economía circular que dea respuestes reales a los retos ambientales y sociales que tien Asturies.
